Niels Thomsen Demokraatini siulittaasunngorpoq

Demokraatit siulersuisuunerisa Niels Thomsen siulittaasutut qinerpaat, tamanna partiip nuna tamakkerlugu ataatsimeersuarnerani ippassaq arfininngornermi Ilulissani pivoq.

siulittaasoriunnaagaata, Randi Vestergaard Evaldsenip, siulittaasunngortoq Niels Thomsen pilluaqquaa. Demokraatit

Apriilimi Inatsisartunut qinersisoqarnerani taaguulluarneqartoq, Demokraatineersoq Niels Thomsen, siulittaasutut unammillerteqarani qinerneqarpoq. Randi Vestergaard Evaldsenip siulittaasutut qinigassanngorteqqinniarani aalajangernerata kingorna, taannamaajip naanerani siulersuisuunernit siulittaasutut innersuunneqarpoq.

- Maniguuppunga

- Soorunami nuannaarpunga. Kisianni aamma akisussaaffik suliassarlu angimmat maniguuppunga, sulinissannullu piareersimasutut misigisimallunga, Niels Thomsen, siulittaasutut qinigaanermi kingorna Sermitsiaq.AG-mut taama oqarpoq.

Demokraatini siulittaasutut qinigaarlaaq siulittaasutut nuna tamakkerlugu ataatsimeersuartoqarnerani qineqqusaarluni oqalugiarpoq. Partii anginerulernissamik sulissuteqassasoq, oqalugiaataani pingaarnerit ilagaat.

- Partiitta iluani qanoq sulinissamik oqariartuuteqarpunga. Partiitut alliartoqqittariaqarnerput ilaatigut oqariartuutigivara suliarerusullugu, taamaaliornikkut nunarput tungujornerulertissagatsigu. Tassuunakkut inuiaqatigiinnut iluaqutaasumik nikeriartitserusukkatta, Niels Thomsen oqaluttuarpoq.

Siammasinnerusunut saaffiginninneq

Demokraatit anginerulernissaanik anguniagaqarnermi siulittaasunngortoq partiip maannamit siammasinnerusunut saaffiginninnissaanik kissaateqarpoq.

- Politikkerput suli ineriartortittariaqarparput. Ilaatigut politikkitta ilaa maanna ersernerlugisarpara, siammasinnerulertinnissaa maanna suliassaraarput. Qinersisartut assigiinngitsunik ukiullit aamma soqutigisallit saaffiginerullugit. Politikkerput tamakkiinerutikkusuppara. Imaanngitsoq politikki pikkunaatsoq allanut assingusoq.

Namminiilivinneq pillugu

Nunatta namminiilivinnissaa pillugu oqallinneq aamma Niels Thomsenip oqaaseqarfigaa.

- Namminiilivinnissamik oqallittarnermi immaqa inuiaqatigiinni tamangajatta anguniagarigipput oqaatigineqarsinnaavoq. Kisianni qanoq angunissaanut oqallinnermut killikkaangatta isummagut assigiinneq ajorput. Takorluukkkatut sinnattupajaatut ilaannit isigineqartarluni, ullormiit ullormut angoriaannartut.

- Namminiilivinnissap tungaanut ingerlassagutta, sammisat assigiinngitsut oqaluuserisariaqarpagut, ajornartorsiutigullu aaqqiillugit. Namminiilivinnissarlu angussagutsigu suut pisariaqarnersut paasillugu, Niels Thomsen oqarpoq.

Qinersinissat tulliinut piareersartut

Demokraatit nuna tamakkerlugu ataatsimiinnerat ullumi sapaammi nanginneqarpoq, tassani oqallisigineqassallutik politikkerpassuit. Pingaarnertut oqallisigineqassaaq Inatsisartunut, Kommunalbestyrelsinut, Folketingimullu tulliani qinersinermi periusissat.

Demokraatit siulersuisuuneri nuna tamakkerlugu ataatsimeereernerup kingorna ima isikkoqalerput:

Siulittaasoq: Niels Thomsen
Politikkimut akisussaalluni siulittaasumut tullersorti: Randi Vestergaard Evaldsen
Aaqqissuussaanermut akisussaalluni siulittaasumut tullersorti: Nivi Olsen
Aningaaserisoq: Malene Vahl Rasmussen
Siulersuisuni ilaasortaq: Rachel Ingemann
Siulersuisuni ilaasortaq: Lena Ravn Davidsen
Siulersuisuni ilaasortaq: Justus Hansen
Sinniisussaq siulleq: Andrie Sørensen
Sinniiussat tullia: Simigaq Heilmann
Sinniisussat pingajuat: Anâ-Grethe Klein
Sinniisussat sisamaat: Karl Peter Herlufsen
Sinniisussat tallimaat: Anna Wangenheim
Sinniisussat arfernat: Erne Olsen

Powered by Labrador CMS