kommunimut qinersineq

Nick Nielsen: Silap pissusaanut misissuinerni teknologiit ineriartortinnerinut misileraasarfeqalerli

Qinersisoqareeriarpat avatangiisinut silallu pissussaanut misissuisarnerni atortorissaarutiliortarfiit annerit kommunitta saaffigissagaat, paasiniarlugu Nuummi Sermersuumiluunniit allani, misissuisarnernut atortorissaarutit ineriartortinneqarneranni misileraasarfinnik nunatsinni pilersitsisoqarsinnaannginnersoq, Kommuneqarfik Sermersuumi IA siunnersuuteqarpoq

Silap pissusaanut misissuinerni teknologiit ineriartortinnerinut Sermersuumi misileraasarfeqalertariaqarpoq, Inuit Ataqatigiinneersoq Nick Nielsen oqarpoq.

Silap pissusaanut misissuinerni teknologiit ineriartortinnerinut Sermersuumi misileraasarfeqalertariaqarpoq.

Inuit Ataqatigiinneersoq Nick Nielsen, illoqarfiit pingaarnersaanni kommunimut qinersinermi qinigassanngortittoq isumaqarpoq.

Tassami taanna partiilu isumaqarput, avatangiisinut silallu pissussaanut misissuisarnerni atortorissaarutiliortarfiit annerit kommunitta saaffigissagaat, paasiniarlugu Nuummi Sermersuumiluunniit allani, misissuisarnernut atortorissaarutit ineriartortinneqarneranni misileraasarfinnik nunatsinni pilersitsisoqarsinnaannginnersoq.

Anorip seqernup nukinganik ineriartortitsineq
Tamannalu kommunimut qinersinerup kingorna pisariaqarpoq, taanna tusagassiuutinut nalunaarummi allappoq.

Ukiut arlallit ingerlaneranni teknologiip taamaattup nunatsinni ineriartortinneqarnissaanut sinaakkutissanik pilersitsisinnaasuugutta, taassuma pissanganarluinnartutut isumaqarfigissagaluarpaa.

- Siunnersuutiga tassaavoq, ukiuni tulliuttuni suliffeqarfiit anorip, seqernup, mallillu nukigisa atorneqarnerunissaannut teknologiimik ineriartortitsisut, aamma biilinik innaallagissamoortunik, milluaasiuutinik, sananermullu atortussianik allanik, issittup silaanut imaannaanngitsumut naleqquttunik, suliaqartut, attavigineqassasut.

- Suliffissuit sanaaminnik misileraallutik pitsanngorsaasinnaanerannut kommunerput periarfisseeqataasinnaasuuppat, nunarsuatsinni silap pissusaanut avatangiisinullu ilorraap tungaanut saatitsiniarnermut ilapittuuteqarluassangaluarpugut – aammali uagut nammineq ineriartortitsisinnaanerput, ilisimasaqassuserput, ilisimatuutullu sulineq qaffassassangaluarpavut, ilutigalugu suliffissanik nutaanik pilersitsilluta, soqutiginnittullu nunarsuatsinnit tamaneersut nunatsinnukarnissaannut pilerisutsilerlugit, Nick Nielsen oqarpoq.

Powered by Labrador CMS