qinersineq

Nick Nielsen: Qaqortumi mittarfik ileqqaarnerussaaq

Siumup Inatsisartunut qineqqusaartitaa Nick Nielsen isumaqarpoq Qaqortumi mittarfiliorluni sanaartornissaq piaartumik aallartinneqartariaqartoq

Nick Nielsen, naalakkersuisoq for uddannelse
Siumumeersup Nick Nielsenip tikkuarpaa inuiaqatigiit 664 million koruunik ukiuni tulliuttuni 25-ni sipaarsinnaasut Qaqortumi 463 million koruuninik nalilimmik mittarfiliortoqarpat

Inatsisartunut qinigassanngortittoq Siumumeersoq Nick Nielsen Qaqortoq 463 million koruuninik nalilimmik mittarfittaassanersoq pillugu oqallinnermut akuleruppoq.

Inuit Ataqatigiit Qaqortumi mittarfiliorniarnermut aningaasaliissutissat inissialiornermut atorusunnerugaat, Naalakkersuisuni ilaasortaasimasoq Nick Nielsen isumaqarpoq Qaqortumi mittarfiliorluni sanaartornissaq piaartumik aallartinneqartariaqartoq.

Nick Nielsenimmi qularinngilluinnarpaa inuiaqatigiit 664 million koruunit ukiuni tulliuttuni 25-ni sipaarsinnaagaat Qaqortumi mittarfiortoqarpat.

- Qineqqusaarnermi taakkartorneqarpoq Qaqortumi mittarfiliornissaq akisuallaartoq. Paasissutissanik aalajangersimasunik saqqummiiniarpunga. assartuussineq pillugu ataatsimiititaliap paasissutissatai toqqammaviussapput saqqummiinissannut.

Taama Siumut sinnerlugu Inatsisartunut qinigassanngortittoq Nick Nielsen allappoq, taanna aamma assartuussineq pillugu ataatsimiititaliami ilaasortaasimavoq. Taannalu ima nangippoq:

- Kisitsinermi ukiut 25-t aningaasaliiffingineqarsimanerat toqqammaviuvoq. Ataatsimiisitaliap misissuinermini Qaqortumi mittarfiup sumiiffissai assingiinngittut taakkartorneqarpai.

- Politikkikkut aalajangerneqarpoq sumiiffiup aappaa mittarfiliornermi toqqammaviussasoq. Kisitsisit takutippaat mittarfiliornissamut 463 million koruunit aningaasartuutaassasut. Taakkartorneqarportaaq inuiaqatigiit 923 million koruunit ingerlatsinermut aserfallatsaaliinermullu sipaarutigissagaat. Uani pingaaruteqarpoq eqqumaffigissallugu Narsarsuarmi mittarfiup matusimanera kisitsinermi toqqammavigineqarmat, Nick Nielsen taama tikkuaavoq.

- Nalunaarusioq ukiut sisamat matuma siornatigut suliarineqarpoq. Kisianni kisitsinermi toqqammaviusut sul taakkuupput, taamaattumik nalunaarusiaq suli uppernassuseqarpoq.

IA kisitsinik toqqammavissaaleqivoq
- Inuit Ataqatigiit taakkartorpaat mittarfiliornissaq akisuvallaartoq. Paaserusuppara kisitsinerit suut toqqammavittut atorneqarnersut?, Nick Nielsen aperivoq.

- Kisitsisit tigussaasut uani maqaasinarput. Inissiarpassuit 600 million koruuninut sananeqarsinnaapput ukiut 25 ingerlaneranni, tamannalu mittarfiup pilersinnerata akianit 400 million koruuninit annertuneruvoq.

Nunatta kujataani illoqarfiit pingaarnersaata mittarfittaarnissaanut pilersaarut saqqummeraluarpoq aningaasaqarnermut naalakkersuisuusimasup Vittus Qujaukitsup aningaasaqarnermut inatsisissatut 2015-mut Naalakkersuisut siunnersuutaat aggustimi saqqummiummagu. Siunnersuut novembarimi taasissutigineqartussaangaluarpoq, kisiannili qinersisoqartussanngormat qatangiinnarneqarallarluni.

Powered by Labrador CMS