folketingimi ilaasortaq

Nick Nielsen Mount Everestiliaqqilersoq

Doris Jakobsenip Folketingimi sinniisaa Nick Nielsen Folketingimi ilaasortatut marlunngornermi akuerineqarpoq. Akueritinnermi nalaani Nepaliliarnissani pissutigalugu Tysklandimiippoq

Folketingimi ilaasortanngortoq Nick Nielsen Nepalimi juullisiussamaarlunilu ukiortaarsiussamaarpoq

- Nepalimut angalanissara qangali pilersaarutigilerpara, Doris Jakobsenip Folketingimit sulinngiffeqarnissaminut qinnuteqaateqanngitsorli angalanissara pilersaarutigalugu, Nick Nielsen, Siumut, Tysklandimi Düsseldorfimiittoq Sermitsiaq.AG-mut marlunngornermi oqarpoq.

- Nepalilialerpunga. Nammineq kajumissusera atorlugu angalalerpunga. Folketingimi ilaasortaalernissara qilanaaraara, Nick Nielsen oqarpoq.

Politikkeri aamma qaqqasiornermik nuannarisaqarluartoq Mount Everestimi basecampiliassaaq 5.365 meterinik qatsitsigisumi.

- Ikinngutera Mount Everestimullu 2005-mimi qaqeqatera ilagalugit angalassaanga, Nick Nielsen oqaluttuarpoq. Nepalimi ukiortaarsiussamaarluni aamma oqarpoq.

Danmarkimi aningaasanut inatsissaq pingasunngornermi pingajussaa Folketingimi oqaluuserineqassaaq. Nick Nielsenip aningaasaqarnermut ministerimut Bjarne Corydonimut Socialdemokraatimeersumut inatsisissatut siunnersuutaanut akuersaarniarluni nalunaarpoq.

Nick Nielsen Folketingimi ilaasortartut marlunngornermi akuerineqarpoq.

Kalaallit Danmarkimi najugaqartut inuunerminnik ajornartorsiuteqartut pillugit aningaasaqarnermut ministerip iliuuseqarfiginiarpai. Iliuuseqartoqapallattoqartariaqartorli Siumumit oqariartuutigineqarpoq.

- Danmarkimut nunasisunut kalaallillu inuunerminnik ajornartorsiutillit pillugit 4 million koruunit atorneqassapput. Aningaasat atorluarneqassapput, kalaallinut inuunerminnik ajornartorsiuteqartunut iluaqutaassallutik, Nick Nielsen aningaasaqarnermut ministerimut ilaatigut allappoq.

Aningaasaliisoqarnissaa IA-mit suliarineqartoq
Danmarkimi aningaasanut inatsisissaq Inuit Ataqatigiinnit Johan Lund Olsenimit aamma akuersissutigineqassaaq.

Kalaallit inuunerminnik ajornartorsiuteqartut aningaasaliiffgineqarnissaanik partiip siunnersuutaa aningaasaqarnermut ministerimit Bjarne Corydonimit piffissaq kingullerpaaq atorlugu akuerineqarpoq.

- 4 million koruuninik 2015-imi aamma 2016-mi aningaasaliisoqassaaq. Katillugit 8 million koruunit atorneqassapput, taakkulu kalaallinut inuunermikkut ajornartorsiuteqartunut pitsanngorsaatissatut atorneqassapput, Inuit Ataqatigiit folketingimi ilaasortaatitaata Johan Lund Olsenip naammagisimaarinnilluni marlunngornermi oqarpoq.

Powered by Labrador CMS