arnat ulluat
Nick Nielsen: Kikkut tamarmik naligiimmik pineqassapput
- Suli sorsuutigisassaqaqaagut, naligiissitaanermut naalakkersuisoq Nick Nielsen arnat ulluannut atatillugu oqarpoq
Arfininngorneq martsip arfineq-pingajuat, arnat nunarsuarmi tamarmi ulloraat, taannalu ukiut tamaasa nunarsuatsinni sumi tamani nalliussineqartarpoq, pissutissaqarluartumik, tassami suli sorsuutigisassaqaqimmat, ilinniartitaanermut, ilageeqarnermut, kultureqarnermut naligiissitaanermullu naalakkersuisoq Nick Nielsen Siumut tusagassiutinut nalunaarummi oqarpoq.
Ukiarmi Inatsisartut naligiissitaanermut inatsit nutaaq akuersissutigivaat, inatsillu taanna aqqutissiuussissaaq naligiissitaanerup iluani pitsaasumik ineriartortitsinissamut.
- Naalakkersuisut kissaatigaat inuiaqatigiit imminnut naligiissutut pissusilersorfigisut. Arnat angutillu ulluinnarni unammilligassaqartarput, ajoraluartumilli amerlavallaartutigut tusartarpagut ingammik arnartagut annersarneqartartut kinguaassiuutitsigullu atornerlunneqartartut. Inatsit nutaaq aqqutigalugu, kiisalu nakuusertoqartarneranut akiuiniarluni anguniakkat iliuusissatullu pilersaarusiat aqqutigalugit niviarsiaqqanut arnanullu ulluinnarni akuerineqarsinnaanngitsunik atugassaqartitaasartunut tapersersuinerput ersarissumik takutinniarparput, Nick Nielsen oqarpoq.
Oqallinnissaq pingaarutilik
Nick Nielsen-ilu itisilerilluni oqarpoq naligiissitaaneq assigiinngitsunik pissuteqartumik suli suliassani qitiutinneqartoq:
- Nakuusertarneq allatigullu naapertuilluanngitsuliortoqartarnera kisiisa akiorniassanngilagut, aammali qanoq suiaassuseqarnermik tunngavilimmik pissusilersuiffiginnittarnerit tamatigut pitsaasuusanngitsut inuiaqatigiinni suli atugaasut aamma akiorniassavagut.
- Taamaattumik 8. marts ulluuvoq pingaaruteqartoq, tassuuna uagut inuiaqatigiittut pissutsinik pineqartunik tigussaasunngortitsinissatinnut periarfissinneqartarpugut, tassami taamaallaat pissutsit oqaluuserinerisigut oqalliseqatigiinnitsigullu aaqqiissutissanik inuiaqatigiinni atorluarsinnaasunik pilersitsisinnaagatta, naligiissitaanermut naalakkersuisoq oqarpoq.
Nangipporlu:
- Sulimi sorsuutigisassaqaqaagut, neriuutigaaralu ajornartorsiutinut pineqartunut tunngatillugu iliuusissatut suliniutaasut tapersersorneqarluarumaartut.