Folketinngi
Nick Nielsen Folketingimi ilaasortanngorpoq
Siumumeersuoq Doris Jakobsen peqqissutsimut nunani avannarlerluni suleqatigiinnermut naalakkersuisunngortussaanera pissutaalluni sinniisaata tullia Nick Nielsen Folketingimi ilaasortaalissaaq
Ilinniartitaanermut, kultureqarnermut, ilageeqarnermut naligiissinaanermullu naalakkersuisuusimasoq Nick Nielsen, Siumut, naalakkersuisunngortussamut Doris Jakobsenimut Folketingimi aappaattut sinniisaanini pissutigalugu Folketingimi ilaasortaalissaaq.
Vittus Qujaukitsoq, Siumut, siullertut sinniisaagaluarpoq, nunanut allanut, inuussutissarsiornermut, suliffeqarnermut niuernermullu naalakkersuisunngortussaanerali pissutigalugu Nick Nielsen Folketingimut ilaasortanngortussanngorpoq.
Nick Nielsenip Folketingimi sulilluarnissaa Doris Jakobsenimit qularutigineqanngilaq.
- Folketingimut qinersisoqangajalerpoq. Nick Nielsenip ilaasortanngortussanngornera eqqissisimaffigaara, politikkikkummi annertuumik suliaqartareerpoq. Inuusuttuuvoq uummaarissoq siunissamullu takorluugaqarluartoq, Doris Jakobsen Nick Nielseni pillugu Sermitsiaq.AG-mut oqarpoq.
Nick Nielsenip Folketingimut ilaasortanngortussanngornini pillugu Sermitsiaq.AG-mut oqaaseqarusunngikkallarpoq.
Dorisip sulinissaminut piareersimavoq
Naalakkersuisooqatigiinnissamut isumaqatigiissutip anguniagaanut suliaqarnissani naalakkersuisunngortussaq Doris Jakobsen piareersimavoq.
- Peqqissutsimut nunani avannarlerluni suleqatigiinnermut naalakkersuisunngornissara qilanaaraara. Qineqqusaarnermi oqariartuutigineqartut ingerlateqqillugit suliaqassaanga, Doris Jakobsen oqarpoq. Kultureqarnermut, ilinniartitaanermut ilageeqarnermullu Doris Jakobsen 2005-mit 2006-mut naalakkersuisutut atorfeqarpoq.
Kalaallit Nunaanni ajorunnaarsinnaanngitsut toqujartorfissaannik pilersitsisoqarnissaa Doris Jakobsenip sulissutigissavaa. Københavnimi kalaallit peqqissarfianni kalaaliminernik nerisaqartoqalernissaa kiisalu nakorsiartut Kangerlussuakkut angalasut pitsaanerusumik atugassaqartinneqalernissaat aamma sulissutiginiarpai.
Doris Jakobsen Inatsisartunut qinigaaqqippoq, Naalakkersuisunngortussaanerali pissutigalugu Inatsisartuni sulinngiffeqarnissamut qinnuteqassalluni. Inatsisartut inissititerlutik ataatsimiinnerat tallimanngorpat pissaaq.