qinersineq

Nick Nielsen: Demokraatit iluareqqusaarlutik qineqqusaarput

Demokraatit siunissami Naalakkersuisut aningaasartuutigisartagassaat saqqummiuttalerusuppaat - Iluareqqusaarluni qineqqusaarneq, Siumup Inatsisartunut qineqqusaartitaa Nick Nielsen oqarpoq. Demokraatit uparuaaneq tunngavissaqannginnerarpaat

Siumut sinnerlugu Inatsisartunut qinigassanngortittoq Nick Nielsen

Sermitsiaq.AG-mi marlunngornermi oqaluttuaraarput Demokraatit siunissami Naalakkersuisuujumaartussat aningaasartuutigisartagassaat tamaasa Naalakkersuisut nittartagaannut saqqummiuttalerusukkaat. Aningaasartuutit soorlu angalanernut, ilassinninnernut, oqarasuaatinut tunissutinullu.

Kisianni maanna ilinniartitaanermut, kulturimut ilageeqarnermut naligiissitaanermullu naalakkersuisuusimasup Nick Nielsenip Anda Uldum avoqqaaraa.

- Iluareqqusaarluni qineqqusaarneq!

- Ullumikkut ammasumik ingerlasoqarpoq. Tamanna naalakkersuisup nammineq aqutassaraa qanoq ingerlatissanerlugu, Nick Nielsen Demokraatit innuttaasut aningaasaataanik ingerlatsinermi ammasuulluinnarnissamut tunngasumut siunnersuuteqareersullu oqarpoq.

Nick: Uanga suut tamaasa qaqinnikuuakka
- Uanga nunatsinni politikerini kisiartaallunga aningaasartuutinut pineqartunut ammasumik pissuseqarsimavunga. Innuttaasut ataavartumik aningaasartuutinnik ilisimatittarsimavakka, Nick Nielsen allappoq Demokraatillu ilinniartitaaneq pillugu naalakkersuisuni ilaasortarisimasaat Palle Christiansen saassullugu:

- Politikeri Demokraatineersoq ammasumik pissuseqarsimanngilaq, soorlu angalasarnerminut aningaasartuutinut. Siulimami 2011-mi aamma 2012-imi angalanerinnarmut 815.000 koruunit atorsimavai.

- Sooq kisitsisit taakkua qaqinneqarsimanngillat innuttaasunut ammasuunissamik kissaateqartoqarpat?, Nick Nielsen aperivoq.

Siulini saassuteqqippaa
Tamatuma kingorna Nick Nielsenip ukiuni marlunni naalakkersuisuunermini aningaasartuutigisimasani saqqummiuppai, soorlu angalanernut 640.000 koruunit atorsimagini kiisalu piffissami tamatumani oqarasuaammut 15.000 koruunit atorsimagini, siuligisamili (Demokraatineersup Palle Christiansenip, aaqq.) oqarasuaammut ukiumut 250.000 koruunit aningaasartuutigisarsimagai.

- Iluareqqusaarneruvoq ammasuunissamut qineqqusaarnermi qaqitaqarneq. Uani nammineq iliuuserisat apeqqutaapput. Demokraatineersut politikerit aningaasartuutitik isertuussimavaat. Inuillu aatsaat tusagassiortut paasissutissanik ujartuineranni tamakkua paasisimavaat.

- Taamaammat isumaqarpunga Demokraatinit akikinaariniarnerusuoq ammasuunik piumaqarluni qineqqusaarneq, illuatungaaniit iliuuserisat allarluinnaasut, Nick Nielsen oqarpoq.

Demokraatit uparuaaneq tunngavissaqannginnerarpaat
- Anda Uldum, Demokraatit siulittaasut, Nick Nielsenip uparuaalluni oqarnera Demokraatit iluareqqusaarlutik qineqqusaarut qanoq isumaqarfigaajuk, ilissi Naalakkersuisut siunissami aningaasartuutaanut ammasuunissamut kissaateqarnissinnut?

- Nick Nielsenilu uagut iluareqqusaarnermut paasinnittaaserput assigiigunanngilaq. Uanga ammasuunissamut kissaateqarlunga siunnersuuteqarninnut pissutaavoq qinersinissap uuma tunngavigisaa, tassalu Siumumi Atassummilu politikerit naalakkersuisutut akisussaaffimminnut naapertuuttumik tigumminnissinnaasimanngimmata. Uanga isumaqarpunga siunissami taama pisoqaqqissanngitsoq tamakkiisumik ammasuunissamik eqqussisoqarpat. Tamannalu iluareqqusaarnerunngitsoq uanga isumaqarpunga. Nick Nielsenilu iluareqqusaarnermut tunngasunik eqqartuerusussappat isumaqarpunga partiiminut nammineq qiviartariaqartoq. Uangami paasinnittaasera malillugu iluareqqusaarneruvoq naammassisinnaanngisanik neriorsuuteqaraanni. Isumaqarpungalu Siumut qineqqusaarnermi matumani taamaaliortoq.

Jens B. Frederiksen aamma Palle Christiansen
Nick Nielsenip siulimi Palle Christiansenip naalakkersuisuni ilaasortaanermini - Nick Nielsenip oqarneratut- 2011-mi aamma 2012-imi angalanermut 850.000 koruunit atorsimavai. Nick Nielsenilu aperivoq ’sooq kisitsisit taakkua innuttaasut qaqinneqarsimanngillat ammasuunissamik piumasaqaraanni?’ Apeqqummut tassunga qanoq akissutissaqarpit?

- Siullermik oqaatigerusuppara erseqqissaatigalugu Jens B. Frederiksen aamma Palle Christiansen kukkunersiuisut misissuinerannit uparuaatissarsiffigineqanngimmata, taakkualu misissuinerit inerneri bankboksimut toqqorneqarsimapput. Pallellu (Christiansen, aaqq.) angalasarsimaneranut atatillugu malittarisassat malillugit angalasarsimavoq. Uanga naliliinera malillugu malittarisassat taakkua sukaterneqartariaqarput, taamaalilluni suut tamarmik Naalakkersuisut nittartagaannut ilineqartalerniassammata, Anda Uldum akivoq.

- Demokraatinut ajornannginnerulersimava Naalakkersuisuni ilaasortaajunnaarassi kissaatinik piumasaatinillu saqqummiussinissamut?

- Imaappoq illuatungiliuttuunermi uparuaanissaq ajornannginnerusarpoq. Tamanna partiit tamarmik isumaqatigiissutigisinnaangaat ilimagaara. Naalakkersuisunilu issiagaanni naalakkersuisooqatigisat tapersersorneqartarput. Tamannalu naalakkersuisuutitaqartuni kingullerni takuarput. Atassut Siumullu imminnut tapersersoqatigiilermata Aleqap atornerluinera pillugu, Anda Uldum erseqqissaavoq.

Powered by Labrador CMS