KNR
Nick: KNR-ip imminut pigisutut aaqqissuunneqarsinnaanera nalorninartoqartippara
KNR-ip ingerlatsinikkut imminut pigisutut aaqqissuuneqassappat aningaasarpassuit atorneqassasut Nick Nielsen oqarpoq, taama ingerlasoqartillugu tusagassiisarneq eqqornerlunneqassasoq oqarluni
KNR ingerlatsivittut imminut pigisutut aaqqissuunneqassanngilaq.
Ilinniartitaanermut, ilageeqarnermut, kultureqarnermut naligiissitaanermullu naalakkersuisup Nick Nielsenip tamanna naqissuserpaa.
- Nalorninartoqartippara KNR-ip ingerlatsivittut imminut pigisutut aaqqissuunneqarsinnaanera, pingaartumik aningaasaqarnermiit isigalugu. Ingerlatsivik imminut pigisutut ingerlanneqassappat, tamanna uanga paasinninnera naapertorlugu isumaqassaaq aningaasaqarnikkut pituuttat Namminersorlutik Oqartussanut atasut kittorarneqarnissaannik.
- Tamannalu tigussaasunngorlugu isumaqarpoq, KNR-ip assersuutigalugu immikkut ittumik aningaasartuutigisai illorsuup oqummik aqqusaarneqarsimanerata kingunerisaanik, KNR-ip nammineq aningaasalersortariaqassagai, Namminersorlutik Oqartussanut maannakkutut aningaasalersortinnagit. Aaqqissuussinerup taamaattumik kingunerisimassagaluarpaa KNR-ip aningaasaqarnerata assorsuaq akornuserneqarnissaa, tamannalu aamma tusagassiornermi pitsaassutsimut allaat sunniuteqarsimassagaluarpoq, immaqalu allaat KNR-ip ingerlaannarsinnaaneranut akornutaasinnaagaluarluni, Nick Nielsen tusagassiutinut nalunaarummini oqarpoq.
Siulersuisut aaqissugaanerat
KNR-ip siulersuisuini arfineq-marlunnik ilaasortaqarput, ilaasortat marluk Naalakkersuisunit toqqarneqartarlutik. Toqqarneqartuni aappaa siulersuisuni siulittaasuuvoq.
KNR-imi siulersuisuni aaqqissugaanerat allanngortinniarlugu Naalakkersuisut inatsisissatut siunersuuteqarput.
Inatsisissatut siunersuut Inatsisartunit akuerineqassappat KNR-ip siulersuisuini tallimanik ilaasortaqalissaaq, sisamallu Naalakkersuisunit toqqarneqartassallutik
- Qaqugukkulluunniit imminut pigisutut aaqqissuussissagaluaraanni isummerfigisassaajuaannassaaq ingerlatsivimmi siulersuisussanik toqqaasarnerup qanoq aaqqissuunneqarnissaa, Nick Nielsen oqarpoq.