qimangutsitsineq
Niaqornamut angerlartoqarsinnaalerpoq
Niaqornat aarlerinartorsiorfiujunnaarpoq. Innuttaasut angerlaanneqarnissaat kommunip Namminersorlutillu Oqartussat sulissutigaat.
Annonse
Niaqornat malissuarmik aarlerinartorsiorfiujunnaartoq ullumi politiit nalunaarutigaat.
Tamatumunngalu tunngatillugu nunaqarfimmit qimangutsinneqarsimasut qimangutsisimaannarnissaasa attatiinnarnissaat pisariaaruttoq nalilerneqartoq, Qaasuitsup Kommuniata Namminersorlutillu Oqartussat paasissutissiaraat.
Suleqatigiit taakku Niaqornani innuttaasut sulisulli qanoq nunaqarfiliaanneqarnissaannik aaqqissutissamik ujaasileruttorput. Innuttaasut pineqartut, suliffeqarfiillu toqqaannartumik nalunaarfigineqassapput.
Kisianni Illorsuarmit Nuugaatsiamiillu qimangusseqqani allannguuteqarani attatiinnarneqarpoq. Tamatumunnga pissutaavoq nuna sisooqqilissangaluarpat innuttaasuisa navianartorsiunnginnissaat.