Ilinniarneq

NI Nuummi ilinniartut suliffeqarfiit pillugit pinnguarluni unamminermi ajugaaniutivilersut

Ilinniartut Danmarkimi niuernermik ilinniarfimmeersunik allanik unammisaqassapput

Saamimmit: Nivi Møller, Aila Fencker aamma Palu Geraae

Ilinniartut pingasut, Aila Fencker, Nivi Møller aamma Palu Geraae, Nuummeersut suliffeqarfiit pillugit pinnguarluni unamminermi ajugaaniutivinnissamut wildcardinnapput. Suliffeqarfiit pillugit pinnguaammik unammilluni ajugaaniutivinneq Danmarkimi Finansrådemit aaqqissuunneqarpoq Københavnimilu 20. april 2016 ingerlanneqassalluni.

Ukiup aallartinneraniit NI 1 klassit akunnerminni imminnut unammisaqattaarlutik aamma Danmarkimi handelskolenut suliffeqarfiit pillugit pinnguarluni unammisaqattaarnerit ingerlappaat.

Pitsaanerit qulit akornanniittut
Peqataaasut nunap immikkoortuinut agguarsimapput uanilu NI 1-ermiut Jyllandip avannaamiunut ilaasimallutik. Ilinniartut pingasut taakku pinnguarluni unammisaqattaarnerup ingerlanera tamaat pitsaanerit qulit akornanni inissisimasimapput.

Nunap immikkoortuinut tallimanut agguarsimapput nunallu immikkoortuini ajugaasoq ajugaaniutivinnermi peqataasussanngorluni. Taassuma saniatigut wildcards-it pingasut agguaanneqarput, taakkulu ilaat ataaseq NI 1-imi ilinniartunut tunniunneqarluni.

Wildcardsit tunniunneqartarput suliffeqarfiit pillugit pinnguarluni unammisaqattaarnermi angusarissaarluarsimasunut.

Holdit katillugit 800 missaat Suliffiit pillugit pinnguarluni unamminermi peqataasimapput.

Suliffeqarfik piviusuusaartitaq
Pinnguaat unammissut suliffeqarfimmut internetikkut piuviusuusaartitamut tunngasuuvoq, peqataasut niuernermut aningaasaqarnermullu periarfissanik piumasaqaatinillu piviusumi aamma nassaassaasunik naapitsisarlutik.

Ajugaaniunneq sapaatip-akunnerinik arfineq-pingasunik sivisussuseqartarpoq. Sapaatip-akunnerilu tamaasa peqataasut nioqqutissianut, akinut, nittarsaassinermi suliniutinut il.il. sapaatip-akunnerani tulliani atuuttussanik aalajangigassanik tunineqartarlutik.

Ajugaaniutivinnermi ilinniartut pingasut taanna pinnguaat ingerlatissavaat, kisianni nalunassusaa qaffasinnerussaaq.

Powered by Labrador CMS