NGO-imi suleqatigiit Tanbreez pillugu tusarniaaneq sivitsoqquaat

Australiamiut suliffeqarfiutaat Tanbreez-ip Killavaat Alannguani aatsitassarsiorniarnerat januarip 20-inut 2014 tusarniaaneq ingerlanneqartoq sivitsorneqartariaqarpoq.

Innuttaasut pitsaanerusumik peqataatinneqarnissaat pillugu NGO-imi suleqatigiit tamanna piumasaraat.

Tamanna pivoq peqatigiiffiit kattuffiillu aatsaat 27. november teknik-imut nalunaarusiat tunuliaqutaat aatsaat tusarniaanermut killigitinneqartumut ullut arfinillit sioqqullugit nalunaarusiat arfinillit tiguneqarmata, taakkualu paasissutissat pisortatigoortumik tusarniutigineqartuni kikkunnit tamanit takuneqarsinnaasimasariaqaraluarput.

Tusarniaanissamut killiliunneqarsimasoq sapatit akunneri arfineq pingasut aatsaat tusarniutigineqartussat tamakkiisut namminersorlutik oqartussat tusarniaanermi nittartagaannut saqqummiunneqareerpata aallartissimasariaqaraluartoq NGO-imi suleqatigiit isumaqarput.

Nalunaarusiat maanna saqqummiunneqartut tamanut tassaapput timmissanut, imarmiunut miluumasunut aammalu nunami uumasunut, silap aammalu erngup pissusaanut, tase Fostersø-mik taaneqartartup misissuffigineqarnera, geokemi, suliariniakkap pujoralatsitsinissaanut tunngasut aammalu nunap aatsitassarsiorfiginiakkap itsarnisarsiuunit misissuiffigineqarnera.

- Innuttaasut suliariniakkap sunniutigisinnaasai tamakkiisumik paasinissaat pingaaruteqarluinnarpoq aalajangiisuullunilu tusarniaaneq innuttaasunut qaammaasaqartumik tunngaveqartinneqassappat. Arlaannut sumut attuumassuteqanngitsutut tassa NGO-tut pisortanit paasissutissat pissarsiariniaqqaartariaqarsimagatsigit ujartuinikkut aammalu tusarniaanerup naggataatungaani aatsaat nalunaarusiat taama pingaaruteqartigisut isummerfiginissaanut periarfissinneqarnerput atorsinnaanngilluinnarpoq.

Taseq Fostersø-imik taaneqartartumut aqerlumik killissarititaasut qummut qaangerlugit kuutsitsinissaq NGO-imi suliniaqatigiit ernumassutigaat.

Tatsimut Fostersømut aatsitassat sinnikuinik eqqaavissamut fluorimik aammattaaq akoqarnissaat NGO-nit ernumassutigineqarpoq. Tamanna Avatangiisinut Sunniutaasinnaasunut Nalunaarusiani VVM-ini takussutissartaqanngilaq, taamaattumillu nalunaarusiani tunuliaqutaasuni tamanna aatsaat misissorneqaqqaartariaqarsimalluni.

- Naalakkersuisut qineqqusaaramik aammasumik aammalu tamatigut takunnittussaatitaaneq neriorsuutigalugu qinigaassutigaat. Tamannami pisariaqartinneqarmat. Naalakkersuisut NGO-t uatsitut ittut aammalu soqutiginittut allat pisariaqartumik piffissalerlugit eqqortumik torersumillu tusarniaasarnissaat neriuutigaarput.

Tusarniaaneq pilersaarutit naapertorlugit ullumikkumut killeqartinneqarpoq.

NGO-imi innuttaasut pitassanerusumik peqataatinneqartarnissaat pillugu suleqatigiissitaliat: Inuit Circumpolar Council, Nuup Kangerluata Ikinngutai/Nuuk Fjordens Venner, Transparency International Greenland, WWF Verdensnaturfonden aamma Avataq.