Nets-ip Savalimmiuni dankortit 1000-t matuvai

Computerworld malillugu kortinik akiliutinik selskabip Nets-ip sapaatip akunnerani uani Savalimmiuni visa/dankortit 1000-t sinnillit matusariaqarsimavai.
Tamanna pivoq pasineqarmat savalimmiumi pisiniarfik hackerfigineqarsimasoq, Nets-imili tusagassaqartitsinermut pisortap Søren Winge-p oqaatigiumanngilaa pisiniarfik suna pineqarnersoq, aammalu nettikkut niuerneq pisiniarfilluunniit saassunneqarsimanersoq.
– Paasiniaaneq pissutigalugu pisimasumi paasissutissiivallaarsinnaanngilagut. Pinaveersaartitsiniarlutali kortit 1000-t sinneqartut matullugillu taarserpavut. Atuisartut korti Savalimmiuni kortimik piffigisaminni taarsertissavaat, Søren Winge Ritzau-mut oqarpoq.
Savalimmiut Atlantikup Avannaaniittoq 50.000-t missaannik inoqarpoq.
– Savalimmiut inuttussusaannut sanilliullugu kortit amerlaqaat, Søren Winge oqarpoq.
Qaqutigoortorujussuuvoq kortinik selskabip Nets-ip, Nunani Avannarlerni tamani kortinik akiliutinik ingerlatsisup taamaattunik naammattuugaqartarnera, assersuutigalugu ukiuni kingullerni sisamani-tallimani Danmarkimi taamatut pisoqarsimanngilaq.
– Tamakkua nalinginnaasumik oqaluttuarivallaarneq ajorpagut. Ukiunili kingullerni Nunani Avannarlerni taamatut pisoqarsimanngilaq.. Qujanartumik kortit isumannaallisaagaasorujussuupput.
– Qaqutoortuuvorlu kortinik taama amerlatigisunik taarsiisarnerput, Søren Winge oqarpoq.
Kortinik akiliutinik selskabip oqaatigisinnaanngilaa kortit pineqartut atornerlunneqarsimanersut.