Kujataa
Nersutit nakorsaat: Appat toquinnarnikut attoqinagit
Kujataani appat toquinnarnerannut pissutaasinnaasoq misissorneqarpoq
Nunatsinni nersutit nakorsaasa qullersaat Asbjørn Brandt kaammattuivoq appanik toquinnarnikunik siumuissagaanni mianersorluinnarnissamik. Piffissami kingullermi kujataani appat toquinnarnikut arlallit siumorneqarput taakkulu tiguneqassanngillat inuussutissalerinermut Nunatsinni oqartussaasut isumaqatigiissuteqarfigereersimanngikkaanni.
Suli maannamut paasineqanngilaq sooq appat arlallit piniartunit aallaaneqanngikkaluarlutik Nanortallup Narsallu akornanni qanittumi toquinnartarsimanersut. Appat toquinnarnikut amerlassusaat ilisimaqqissaarneqanngilaq.
Maanna Nunatsinni nersutit nakorsaasa qullersaat Asbjørn Brandt kaammattuivoq appanik toquinnarnikunik asimi naammattuuissagaanni mianersorluinnarnissamik.
- Appat toquinnarsimanerannut pissutaasoq erseqqissumik paasineqarsimatinnagu inuit kaammattorneqarput timmissanik pineqartunik attuinaveersaaqqullugit. Timmissanik nammineerlutik toqusimasunik katersineq aatsaat pisinnaavoq Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup isumaqatigiissuteqarfigereerneratigut, Asbjørn Brandt nalunaarpoq.
Nersutit nakorsaasa qullersaat itisiliisumik Sermitsiaq.AG-mit oqaaseqartinniarneqaraluarpoq maannamut suli iluatsinngitsumik.