Island Games
Nerrivimmi arsaarartartut sulorartartullu bronzennanniunnerni iluatsitsinngitsut
Nerrivimmi arsaarartartoq inuusuttoq Ivik Nielsen ujaminnanngitsorpoq sulorarnermilu mixed doublemi Iidui Broberg aamma Karl Jakob Thomassen aamma ujaminnanngitsoorlutik
Nerrivimmi arsaararnermi piginnaaneqarluartoq kalaaleq Ivik Nielsen Island Gamesimmi Jerseyimi ingerlanneqartumi angutit ataasiakkaarneranni tallimanngornermi bronzennanniunnermi unammivoq.
Ajoraluartumik Björn Axelssonimut Gotlandimeersumut immikkoortuni sisamani erseqqissumik ajorsarpoq.
Taamaalillutik nerrivimmi arsaarartartut Island Gamesimi ujaminnanngitsuuipput.
Qasullunilu ajoqusersimasoq
Nuna tamakkerlugu sungiusaasoq Tommy Jørgensen pakatsisimavoq.
- Ivik (Nielsen, aaqq.) unammiuaarnerit ulluni arfinilinni ingerlanneqareersullu qasusimavoq. Eqqarsartaatsikkut qasusorujussuuvoq ajoqusersimanerminillu sakkortuumik eqqugaaqqalluni, Tommy Nielsen unammineq naammassineqaqqammersoq oqarpoq.
- Ivik pillugu pakatsinngilanga, kisianni bronzennanngitsoornerput uggoraara. Unammiuaarnerit naliliiffgissagukkit naammagisimaarinnittorujussuuvunga, kvartfinalinut anngunniarluta maaniikkatta. Iligiiaarnermi angutillu ataasiakkaarneranni normu 4-nngorpugut, nuna tamakkerlugu sungiusaasoq oqarpoq.
Sulorartartut aamma ajorsartut
Sulorartartut Iidui Broberg aamma Karl Jakob Thomassen mixed doublemi bronzennanniunnerminni aamma ajorsarput. Charlotte Barnes aamma Matthew Haynes Guernseyimeersut 20-22-mik aamma 7-21-mik ajorsarfigaat.
Island Games 2015 pillugu allaaserisat tamaasa matumani atuakkit