Island Games 2017

Nerrivimmi arsaarartartut medaaliannanniunnernut ilanngupput

Kalaallit nerrivimmi arsaarartartut unammisartui Gotlandimi Island Gamesertoqarnerani angusarissaarusupput. Pissartanngorniunnerni kingullermi sisamaattut angusaqarsimapput. Ukioq mannali medaaliannattoqarnissaa anguniangaavoq.

Kalaallit nerrivimmi arsaarartartut unammisartuisa ukioq manna medaaliannatsitaqarnissartik anguniangaraat.

Arfininngormat Island Games Gotlandimi, Sverigip kangiani qeqertaaqqami ammaanersiorneqarpoq. Ullumikkulli unammisaqattaarnerit aallartipput.

Timersortartut unammisussat ilaat ullummikkut unammisussat ilagaat kalaallit nerrivimmi arsaarartartui, taakkuli unamminissanut piareersimalluinnarput.

- Aallartinnissarput qilanaaraarput. Ukioq manna unammisartut aaqqissuulluangaapput sungiusarluarsimallutilli. Island Gamesinilu pitsaassutsip qaffasinnera unammillernartuujuaannarpoq. Angusarissaassangutta suna tamarmi iluatsittariaqarpoq. Tamannali nuannequtigiinnartarpaa, pisinnaasarpulli tamaat unammiumaarpugut, nuanut allanut sungiusaasoq, Tommy Jørgensen oqarpoq.

Aamma atuaruk: Timersortartut Gotlandiliarput

Medaaliannattoqassaaq

Ukiut marluk matuma siorna unammisartut angusarissaarlutik marlunnik sisamaattut angusaqartitaqarput. Angutit taakku siorna peqataasut peqataassapput, arnanilu arnat unammisartut nutaat pingasut peqataassallutik. Nunanulli allanut unammisartut nalunaarutigaa unammisartoqatigiit iluminni pissagasut, angusarissaarnissamummi anguniakkat pissutaapput: Medaaliannattoqassaaq.

- Ukioq manna Island Gamesertoqarnerani medaaliannattoqarnissaa anguniangaavoq. Angusarissaanissamut periarfissaqarluarpugut, unammersuarnernilu Ivik Nielsen ataasiakkaarnerni angusarissaartussatut ilimagineqartunut ilaavoq. Aammattaaq iligiiaarnerni tamani periarfissangissaarput, nunanut allanut sungiusaasoq oqarpoq.

Aamma atuaruk: Golfertartut marluk Island Gamesinut

Kalaallit nerrivimmi arsaararnermi nunanut allanut unammisartui tassaapput: Melissa Larsen, Rosa-Marie Petersen, Karliinannguaq Lundblad, Poul Jørgen Petersen, Aqqalu Nielsen aamma Ivik Nielsen.

Ullumi sapaammi taakku Isle of Man unammeqqaassavaat, ullunilu pingasuni tulliuttuni katillugit arfineq marloriarlutik unammissallutik.

Powered by Labrador CMS