Ivik Nielsen
Nerrivimmi arsaarartartoq neriunaatilik angusarissaarluaqqittoq
Nunat assigiinngitsut Belgiami nerrivimmi arsaararnermi unammeqattaarneranni Ivik Nielsen angusarissaarluarpoq
Nerrivimmi arsaarartartoq inuusunnerni unammeqataasartoq Ivik Nielsen TTC Hasselt Youth Tournament Belgiami pinsimi ingerlanneqarmat angusarissaarluarpoq. 16-nik ukiulik Ivik Nielsen aalajangeqqammerpoq Danmarkimiinnini ukioq ataaseq nangeqqinniarlugu, tassani atuarnini sungiusartarninilu aallutiinnassallugit.
TTC Hasselt Youth Tournament nunanit assigiinngitsuneersunit peqataaffigineqarpoq. Ivik Nielsenip timersoqatigiiffini Team Nørreå peqatigalugu unammeqataavoq, tassani iligiiaarnermi ataasiakkaarnermilu unammeqataalluni.
Iligiiaarnermi Team Nørreå ingerlalluarpallaanngillat, ataasiakkaarnermili unamminermi Ivik Nielsen takutitsilluarpoq.
Ukioq unammiffiusumi ingerlalluartoq
- Pitsaasumik ataasiakkaarnermi unammeqataavoq, kvartfinalimili tyskimut pikkorissumut ajorsarluni. Kalaallit Nunaanneersumilli nerrivimmi arsaarartartumut angusaq kusanarpoq, nunammi assigiinngitsut peqataaffigisaanni tallimaattut inissippoq, nerrivimmi arsaararnermi nunanut allanut sungiusaasoq, Team Nørreåmilu aamma sungiusaasoq Tommy Jørgensen oqarpoq.
Ivik Nielsen ukiumi qaangiuttumi angusarissaaqattaarpoq. Arctic Winter Gamesimi marsimi ingerlanneqartumi arlaleriarluni ujaminnappoq, kiisalu inersimasuni Nunatsinni pissartanngorluni påskikkunni. Inuusunnerit akornanni Danmarkimi bronzennappoq, Belgiamilu angusarissaarluni.
- Danmarkimi unammeqattaartarnini sungiusaatigilluarpaa, nerrivimmi arsaarartartut kattuffianniillu tapersersorneqarluarluni. Danmarkimiinnini ukioq ataaseq sivitsorpaa, aamma aappaagu arlaleriarluni unammisassaaq, Tommy Jørgensen oqaluttuarpoq.