Nerrivimmi arsaarartartoq DM-imi angusarissaartoq
Kalaaleq nerrivimmi arsaarartartoq Ivik Nielsen, sapaatip-akunnerata siuliani Danmarkimi pissartanngorniunnernut peqataavoq. Taanna pissartanngorniunnermi kisartaalluni pissartanngortumut sæt-imi ataatsimi ajugaavoq.
Kalaaleq nerrivimmi arsaararnermut pikkorilluinnartoq, Ivik Nielsen Sismiuneersoq, sapaatip-akunnerani kingullermi Danmarkimi pissartanngorniunnermut peqataasoq angusaqarluarpoq.
Ivik Nielsenip Danmarkimi pissartanngortoq Anders Lind unammigamiuk takutitsilluarpoq, Nerrivimmi Arsaarartartut Kattuffiat tusagassiuutinut nalunaarummi allappoq.
- Unammineq nunat tamalaani unammisarnertut qaffasitsigisumik ingerlanneqarpoq, unammisut marluullutik taktikkikkut takutitsilluarput. Ivik nukittunerpaaffimminik sukkavallaamik sulivoq, Anders Lindip unammineq sukkassutsiminiitinniarsaralugu ilungersorpoq, unamminermilu ammanissarsiuinnavilluni. Lindip arsaaqqamik kaavisitsineq aamma equngasumik aallartitsisarnini nukittuffigai, taakkunanngalu amerlavallaanik pointinnappoq. Iviup tamanna iluarsivaa, kisianni unamminermi kingusinaalaarluni. Ivik Nielsenip pissartanngorniunnermi kisimi Anders Lind sæt-imi ajugaaffigaa, Nerrivimmi Arsaarartartut Kattuffiat ilisimatitsivoq.
Nunani allani unammisartuunissamik takorluugaq
Ivik Nielsenip timersornini pimooruttorujussuuaa, ukiunilu pingasunikingullerni Danmarkimi najugaqarpoq, qaffasissumik nerrivimmi arsaarartarnissani pillugu. Tamatuma kingunerisaanik inuussutissarsiutigalugu unammisarpoq.
- Danskit pissartanngorniunneranni kalaallimik aatsaat taama angusarissaartigisoqarpoq. Ivik akunnerpassuarni klubbimini B75-imi nunamit allameersumik sungiusaasoqarluni sungiusartarnermini tamanna angusinnaasimavaa,ullormummi marloriarluni sungiusartarpoq. Ivik taamatut ilungersuuteqarnermini Danmarkimi pitsaanerit akornanni qaffasissumi angusaqartalissaaq. Ivik Nielsenip siunissami qaninnermi Europami aamma nunani tamalaani unammiuaarnernut peqataasarnissani anguniagaraa, kattuffimmi siulittaasoq Emil Kleemann tusagassiuutinut nalunaaummi oqarpoq.
Nerrivimmi Arsaarartartut Kattuffiat aamma Ivik Nielsenip eqqaaniittut tapersersortissarsiuleruttortut nalunaarutigineqarpoq, taassuma ineriartornera pitsaasoq suli nukittorsarneqarniassammat.