Neriuffik
Neriuffik Nuuk aallarteqqippoq
Kræfti akiorniarlugu peqatigiiffik Neriuffik immikkut ittumik ataatsimeersuarpoq januaarip 14-ani. Birte Kielsen siulittaasutut toqqarneqarpoq
Kræftimik nappaateqartunut qanigisaasunullu peqatigiiffimmik Nuummi ammaasoqarpoq. Peqatigiiffiup siulia matoqqareerluni aallarteqqinneqarpoq.
- Kræfteqalersimasut qanigisaasullu annertoqqusersoqatigiiffigisaannik katersuutsitsisarnissaq, misilittakkat tunngavigalugit eqqartueqatigiittarneq iluaqutaasaqimmat oqilisaataasarlunilu peqatigiiffiup siunnerfigaa.
Neriuffik Nuuk immikkut ittumik ataatsimeersuarpoq januaarip 14-ani, taamaasilluni peqatigiiffik aallarteqqilluni, tusagassiutinut nalunaarummi allaqqavoq.
- Kræftimik eqqorneqarnermi apeqquterpassuit takkussuuttartut eqqartorsinnaaneri sorpassuartigut oqilisaataasarmat aallarteqqippugut, siulittaanngortoq Birte Kielsen oqarpoq.
Qaammammoortumik unnukkut blok 6-imi peqatigiiffiit ataatsimiittarfianni kræfteqalersimasut qanigisaasullu annertoqqusersoqatigiiffigisaannik katersuutsitsisarnissaq siunnertarineqarpoq. siullermeerlunilu eqqartueqatigiinnissaq pissaaq pingasunngorneq februaarip 25-ani nalunaaqutaq 19:00-imit Piareersarfiup kantiinaani, Jens Kreutzmannip aqqutaa 7.
Siulersuisuni ilaasortaalersut:
- Siulittaasoq: Birte Kielsen
- Siulittaasup tullia: Salomine Fisker Nielsen
- Aningaaserisoq: Hendrine Jensen
- Allatsi: Jørgen M. Benjaminsen
- Siulersuisuni ilaasortat:
- Marie-Maline Kreutzmann aamma Qupanuk Egede
- Sinniisussat: Jonna Broberg aamma Julie Møller