Narsaq
Nerisassiortut Inuilimit nutaat
Ernæringshjælperinngorniat sisamat ataasinngormat Inuilimi misilitsikkamik angusipput
Narsami ernæringshjælperinngorniat sisamat misilitsissutiminni angusipput. Ataasinngormallu ilinniarfiup pisortaanit Anna Marie Knudsenimit allagartassatik tiguaat.
Helga Leibhardt Ilulissaneersoq. Jens Eipe Qeqertarsuarmit. Larsine Lennert Nuummit. Og Cecilie W. Hansen Narsarmioq allagartartaartuupput.
Piginnaanngorsarluni ilinniarfik
Allagartartaaraluarlutik suliffimmi misiliinertik suli piariinnginnamikku kingusinnerusukkut suliffimmi praktikkerfigisaminni allagartassatik tigussavaat.
Ernæringhjælperinngorniarneq piginnaanngorsarluni ilinniarfiup aallarteqqammerpoq, ukiullu aappaa avillugu sivisutigaluni. Ilinniarnermi Inuilimut atuagarsoriarneq pingasunut avinneqarsimavoq suliffimmilu praktikkertoqartarluni.
Ikiortit
Inuussutissat, nerisassat, igaffimmi eqqiluisaarneq nerisassiornerlu ilinniarneqartarput.
Ernæringshjælperinngortullu igaffimmi ikiortitut ilinniarsimasutut sulilersinnaanngortarlutik.
Eqiasuittoq akissarsitinneqartoq
Ilinniarneq ukiup aappaa avillugu sivitsorneqarsinnaavoq. Ilinniartoq ernæringsassistentinngorsinnaalluni, allagartartaartullu tamarmik ingerlaqqissallutik aalajangersimapput.
Jens Eipe eqiasuittut akissarsiarisartagaannit tunineqarpoq. Taanna ilaminut maligassiuiluarnerminik iganermut ilitsersuutinik atuakkamik tunissutisilluni.