Nerisassat
Nerisassanik narrutuneq meeqqat angerlarsimaffimmi ilikkartarpaat
Meeqqat narrutusarnerat qanigisat nerisartagaannik pissuteqarpoq inuup sananeqaataasa assigiinngissuteqarneranik pissuteqarani. Qallunaanik atuartunik 19.000-nik peqataaffigineqartumik misileraanerujussuup kingorna ilisimatuut taamatut inerniliipput
Nerisassat sassaalliutigineqartut meeqqat mamarinngippatigit tamatumunnga angajoqqaat pisooqataalluinnarput.
Tassami meeqqat susunnimut malussarissusaat siullerpaatillugu ilinniagaavoq, Københavns Universietimi susunninnermik ilisimatuut taamatut inerniliipput, qllunaat meeqqat inuusuttullu 19.000-t meeqqat atuarfianni aamma inuusuttut ilinniagaqarfiini ilinniartut misileraaffigereersimallugit.
Manna tikillugu ilisimatuut isumaqarsimagaluarput meeqqat nerisassanut narrutuneranut ilaatigut nassuiaatissaasoq pinngortitamit pilersorneqarsimagatta assigiinngitsumik susussuminut malussarissutsimik.
Sensoriker ilisimatoorlu Michal Bom Frøst, Københavns Universitetimeersoq, naapertorlugu tamanna maanna kasiiligassaannanngorpoq.
– Taavalu ilinniutit allanngortittariaqarput. Maanna ilisimalerparput meeqqat nerisassat tamaasa mamarilersinnaagaat, eqqortunik avatangiiseqarunik nerisassanillu assigiinngitsorpassuarnik atugaqartinneqarlutik, taanna oqarpoq.
0.-klassimiit gymnasiami atuartut katillugit 19.336-it misileraanermi peqataapput, tamatumani klassiminni "nerisassanik misileraatit", ilisimatuunit immikkut katitersimasunik misilerartinneqarlutik.
Tamatuma kingorna atuartut misigisatik skemamut allattorpaat, aammalu tunuliaquttaminnik, nerisartakkaminnik nerisassanillu ilisimanngisaminnut isiginninnerminnut apeqqutinik akissuteqarlutik. Ilisarnartullu meeqqat susunnimik malussarinnerannut pingaaruteqarput, Michael Bom Frøst oqaluttuarpoq, assersuutitullu tallugu meeqqat illoqarfissuarmi Københavnimeersut qeqqussanik misiliutit meeqqanit provinsermiunit mamarinerugaat.
Ilisimatooq naapertorlugu tamtumunnga pissutaavoq meeqqat Storkøbenhavnimi najugallit sushinik pissarsinissaminnut qaninnerummata, taamaattumillu tamakkua susunninnerat qeqqussani ilisarisinnaallugu.
– Pingaarnerusumik isigalugu nerisassap mamassusaa, issorsimassusia tikkalu ilikkarsimagaanni nerisassat mamarineqarnerusarput, Michael Bom Frøst oqarpoq.
– Taamaattumik susunnissutsit, avatangiisit nerisassanullu kulturi peroriartornermi atugaasimasut pingaaruteqarnerujussuupput, inuttut sananeqaatikkut misigissutsit qanoq atuunnerannit assigiinngissuteqalaarnerminngarnit, taanna oqarpoq.