Pinngortitamit nerisassat
Nerisassanik assartuussinerit akikinnerunissaat neriorsuutigineqarpoq
Qaanaamit Qaqortumut arferup neqaata nassiunneqarnera akikinnerulissaaq
Allaaserineqartoq nalunaaqutaq 11.14 nutarterneqarpoq
Kalaalimerngit nassiunneqarnerat Air Greenlandimit akikinnerulersinneqarpoq.
Nassiusseriaaseq nutaaq atserneqarpoq 'Mamaq'. Kalaalimerngit illoqarfinni illoqarfinnut nassiunneqarnerat akikinnerulissasoq Air Greenlandimit neriorsuutigineqarpoq.
Nassiunneqartut qerisut qerinngitsullu nassiunneqarsinnaassapput Mamaq aqqutigalugu. Illoqarfinni nunaqarfinnilu assigiinngitsuni tamanna periarfissaassalluni.
Pingaaruteqartoq
- Kalaaliminernik pisinissaq soqutigineqarneruleriartortoq ilisimavarput, taamaattumillu Kalaallit Nunaata iluani pisariitsumik akikitsumillu nassitsisinnaaneq pingaaruteqarpoq. Periarfissaq atorluarneqanngitsoq takusinnaavarput, taamaattumillu kalaalimerngit siunnerfigalugit nassiussalerinerput pisariillisipparput. Soorunami neriuutigaarput kalaallit tunisassiaataasa annertunerusumik soqutigineqarnerulernissaannut tamanna ilapittuutaassasoq’, Air Greenlandip tuniniaanermut pisortaa Christian Keldsen oqarpoq.
Mittarfinni taaneqartuni sorlerminngaanniilluunniit nassitsigaanni aalajangersimasumik angissusilimmik akiliuteqaqqaartoqartassaaq.
Ajornannginnerullunilu akikinnerussaaq
Nassiussat 1-10 kg-nik oqimaassusillit aalajangersimasumik 300 kr-nik akeleqqaarneqartassapput, nassiussallu 11-20 kg-nik oqimaassusillit taamaallaat 500 kr-nik akeqassallutik.
- Christian Keldsen, akikinnerusumik taava nassiussisoqarsinnaalissava?
- Aap, nassiussineq akikinnerulissaaq.
Qanoq akikinnerutigilerpa?
- Oqaatigiuminaappoq, tassami illoqarfinnut assigiinngitsunut akit assigiiaanngillat. Kisianni siuliani suleriaaseq ajornarnerujussuuvoq, maannakkumiillu ajornannginnerulissaaq.
Akikillingaatsiartoq
Air Greenland assersuusiorluni Sermitsiaq.AG-mut ima nassiussaqarpoq.
Maniitsumit Uummannamut kalaalimernginik 10 kilomik oqimaassusilimmik siornatigut nassiussineq 704,50 koruuneqarpoq. Akiligassaareersut tamarmik akilereerlugit 300 koruuneqalerpoq maannakkut.
20 kilonik kalaalimernginik Maniitsumit Uummannamut siornatigut 1084 koruuneqartoq maannakkut 500 koruuneqalerpoq.
Aamma illoqarfinnut qanigisanut nassiussinerit akikillipput. Soorlu Ilulissanit Aasiannut kalaalimerginik 10 kilonik 515 koruuneqalissaaq, 20 kilollu 705 koruuneqassallutik.
Air Greenlandip paasissutissai uani takukkit
Talerpiata tungaani paasissutissat takukkit