atuarfimmi nerisaqarneq
Nereqatigiittarneq
Suli atuarfiliortoqartarpoq nerisarnerup pingaaruteqassusia eqqarsaatigineqassanani, socialantropolog Jette Eistrup oqallusissiami allappoq
"Nereqatigiittarneq atugarliortinneqaleraluttuinnarpoq, pingaartumik meeqqanut inuusuttunullu atuartuusunut. Tamakkumi ukiut qulit angullugit atuartuusarput", socialantropolog Jette Eistrup oqallisissiami soqutiginartumi allappoq. Taanna Meeqqat Inuunerissut allattoqarfianni pisortaavoq.
Taassuma apeqqutigaa inersimasut meeqqallu nerisarnerat sooq taama assigiinngissuteqartigisoq, innersussutigalugu suliffeqarfinni assigiinngitsuni ataatsimut ullaakkorsioqatigiittoqartarsinnaasoq. Immaqalu immikkut pisoqartillugu kaagisoqatigiittoqartarluni, nillataartitsiveqarluni taqussannut inissiiffigisinnaasannik, immaqalu mikroovn-eqarluni, nerisassanik ippassaammat sinnikunik kissaaffigisinnaasannik.
"Aap, uagut inersimasut nerisassatsinnik isumaginnillaqqippugut, allaat suliffitsinni", taanna oqarpoq aperalunilu: "Takorloorsinnaavarput sulifffeqarfik 100-t sinnerlugit sulisulik, kantiinaqanngitsoq nerisarfeqanngitsorlu nerisassanik naammaginartunik akilinnik pilimmik?" Taavalu Jette Eistrup aperivoq meerartavut taamatut sooq periarfissaqannginnersut.
Allapporlu: "Suli atuarfiliortoqartarpoq nerisarnerit pingaaruteqassusiat eqqarsaatigineqassanani, imaluunniit nerisaqartitsisarneq sipaarniarfigineqartarluni. Taqussat tamatigut illinnarneq ajorput, immaqa ullaaakorsiornissamut piffissaqarpianngilaq, taamaattumik qitornaq atuariartulersoq aningaasamininnguamik tuniinnarneqartarpoq. Immaqalu angerlarsimaffimmi nillataartitsivik imaqarpallaanngilaq, angajoqqaat marluullutik suliffimminni kantiinami ullaakkorsiorsinnaammata imaluunniit nerisassiorsinnaammata. Ajorsartoq tassaavoq meeraq, ajugaasut immaqa tassaapput kioskit, meeqqanut inuusuttunullu kaattunut chipsinik sodavandinillu tunisaqartartut. Uagullu inersimasut suliffeqaratta qaarsillarnissarput isumagissaqqaarparput".
Jette Eistrupip tupigusuutigaa inersiamsut meeqqallu nerisassanik pisinnaanerat sooq taama assigiinngissuteqartiginersoq.
"Uagut inersimasut kisitta nerisassanut nerinermullu sinaakkutassiinissatsinnut pissaaneqarpugut. Meeqqat pissaaneqanngillat, sunniuteqanngillat, immaqa 50 koruuninik kaasarfimmioraluarlutik.
Nutaamik eqqarsarsinnaavugut? Atuarfimmi kantiina, atuartunut eqqaamiuinullu utoqqarnut ammasoq. Imaluunniit illit qanoq isumaqarpit? Qitornatit angerlarsimanngikkaangamik sunik nerisarpat? Jette Eistrup aperivoq.