unioqqutitsilluni
Neqit ilanngaaserisut arsaarinnissutigisarpaat
Kalaalerpassuit Danmarkimiittut arferit neqaat piumalluartarpaat, Kalaallit Nunaannilli nassiussat ilarpassui arsaarinnissutigineqartarput
Siorna Jyllandip avannaani ilanngaaserisut nassiussat 116-it arsaarinnissutigisimavaat.
Neqip annaaneqarnerata saniatigut nassiussanik tigusisussaraluit politiinit mianersoqqussummik tunineqartarput.
Taamatut oqaluttuarpoq DR Nordjylland.
– Neqinik tamakkuninnga avammut annissuinissaq inerteqqutaavoq, Danmarkimullu eqquteqqusaanngillat, biolog Niels Nielsen, Naturstyrelsip Biodiversitet og Arter-imut allaffianeersoq, oqarpoq.
Arsaarinnissuterpassuit
Taamatut inerteqquteqarneq 2006-miilli atuussimavoq, siornali arsaarinnissutit sisamariaammik amerleriataarsimapput, tamannalu pissutigaugu Naturstyrelsip namminersorlutik oqartussat attaveqarfigisimavai.
– Oqaloqatigaavut, nalunaarpullu nassiussisarfinni annertunerusumik paasisitsiniutigilerlugu qilalukkat qernertut neqaannik Danmarkimut nassiussisoqarsinnaanngitsoq, taanna DR Nordjyllandimut oqarpoq.
Taamaattumik inerteqqutaavoq
Qilalukkat qernertat nungusaanissaminnut ulorianartorsiunngillat, qulakkiivilluguli oqartoqarsinnaanngilaq ikiliartunngitsut, taamaattumik Danmarkimut nassiunnissaat inerteqqutaavoq.
Akerlianik kalaallit Danmarkimiittut qilalukkat qaqortat neqaannik tikaagulliillu neqaannik annikinnerusumik nammineq atugassaminnik nassinneqarsinnaapput.