Narsaq
Neqip toqoraavittaava napparnersiorneqarpoq
Kinguaattuulaareerluni sanaartorneq maanna ingerlallualerpoq. Pilersaarutaavoq Narsami toqoraavittaaq septembarip qiteqqunnerani atoqqaarfissorneqassasoq
Sisamanngormat ualikkut Narsami Neqip toqoraavittaava napparnersiorneqarpoq.
Silagissuup ataani silami tuttup neqaanik grillerisoqarlunilu savaaqqamik pølsiliortoqarpoq.
Sanaartugaq tamakkiisumik ingerlanneqarpoq LNS Greenland-imit Qaqortumeersumit, taannalu siusinnerusukkut tassaasimavoq Greenland Mining Service. Suliniutip pisortaa Jørgen Jørgensen oqaluttuarpoq pisut siulittuutigineqarsinnaanngitsut pissutigalugit sanaartorneq kinguaatuulaarsimasoq, maannali pissutsit ima iluarsisimatigaat, toqoraamik isumaqatigiissutigineqartutut aggustip 15-ianni tunniunneqarsinnaassalluni.
Tamatuma kingorna toqoraaviup atortussai ikkussuunneqassapput, tamannali LNS Greenlandip suliassarinngilaa.
Toqoraaviup pisortaata Henning Sønderupip oqaatigaa toqoraavik nutaaq septembarip qiteqqunnerani atoqqaarfissiorneqassasoq, atoqqaarfiussiornerullu kingorna ukioq manna savaaqqanik toqoraaneq ingerlanneqalissasoq.
Sanaartortitsisuuvoq KNI.