Neqi savaaqqanik Islandimut aallerpoq

Kujataani hunnorujulikkaat meertuutigalutik angalaarput. Kisianni savat savaaqqallu amigarluinnarput.

Ingerlatseqatigiiffimmut ilaatigut Namminersorlutik Oqartussanit pigineqartumut, Neqimut Narsamiittumut akisuumik kinguneqartitsipput.

Savaaqqat toqorarneqartartut ukiuni kingullerni ima ikilisimatigipput allaat savanik akitsuusersorneqarsimasunik nunatta avataanit tikisitsisoqartariaqalersimalluni, KNR taama ilanngutassiorpoq.

Atuaruk: Savaaqqat Islandimeersut Neqimi suliffissaqartitsisut

Savaaqqat 10.000 Islandimeersut
Savaaqqat akitsuusersorneqarsimasut Islandimeersut 10.000 tikisitanut ilaapput. Taamatullu niuernermik ingerlatsineq toqoraaviup akiitsuinut maanna 70 millionit koruunit sinneqalersunut qaffatsitsivoq.

Savaaqqat 23.000-it, savallu piaqqiortut 1500-t ukiumut tunineqartarnissaat politikerit 2011-mi naatsorsuutigaat. Savaaqqat toqorarneqartartut taamanikkulli ikiliartorsimapput, savaaqqallu siorna toqorarneqartut 18.400-uupput, ukioq mannalu immaqa ikinnerussallutik, KNR taama ilisimatitsivoq.

Atuaruk: Neqimut savaaqqat ikinnerusut

3,5 millioninik amerlanerusunik perusuttoq
Neqip savanik nunanit allaneersunit eqqussuinermi akitsuutip atuutsinneqannginnissaa Namminersorlutik Oqartussanut qinnutigisimagaluarpaa itigartinneqarlunili, maannalu kiffartuussinissamik isumaqatigiissutini 3,5 millionit koruuninik ilaneqarnisssaa Neqip qinnutigaa.

- Tamanna pillugu Namminersorlutik Oqartussanut sukataaruteqarnermut Narsami suliffiit pigiinnarnissaat kissaatigineranut pissutaavoq. Qaammatip ataatsip affaannaanilu 70-inik sulisoqartarnissarpummi kissaatiginngilarput, Per Jensen, toqoraavimmi Neqimi pisortaq KNR-imut oqarpoq.

Allaaserisaq tamaat KNR-imi atuaruk: Neqi A/S ikioqquvoq