Skip to main content

Neqi A/S-ip naatsiaat 50 tons tungaanut igikkai

Naatsiaat nunatsinneersut 50 tons tungaanut Narsami Neqi A/S-imit iginneqarput. Naatsiaat Neqi A/S-ip siorna naatsiaarsiaanit sinneruttuupput.

Neqi A/S-imi ingerlatsinermut aqutsisuungallartoq, Knud Albrechtsen, Sermitsiaq.AG-mut nassuiaavoq naatsiaat siorna aggustimi aamma septembarimi naatitaasut, taakkualu kujataani naatitsisunit Neqi A/S-imit sinerissani niuertarfinnut nioqqutissiareqqinniarlugit pisiarineqarsimagaluarlutik.

- Naatsiaat siorna pisiatta sinnerivaat, taakkua pisiniarfinnut tunisinnaasimanngilagut. Ajuusaartorujussuungaluarpugut igiinnartariaqaratsigit, Knud Albrechtsen oqarpoq.

Narsami innuttaasut ilaata, kinaatsumillu saqqummiusserusunngitsup, Neqi A/S-ip naatsiaanik eqqaanera eqqumiigivaa. 

- Naatsiaat agguararlugit, franskekartoffeliliaralugit imaluunniit aggorlugit tuniassiarineqarsinnaannginneramik, innuttaasoq taama aperaaq.

Taamaaliortoqarsinnaanngitsorli, Neqi A/S-imit akipput.

- Naatsiaat siornarnisaapput maannalu asiusimallutik nerineqarsinnaajunnaaqqapput, Knud Albrechtsen oqarpoq.

Nunarput ukiumut naatsiaanik 1.500 tonsinik eqqussisarpoq

Neqi A/S-ip kujataanit naatsiaanik naatitsisunit naatsiaat 110 tonsit tungaanut siorna pisiarai, taakkuali affaannai Nunatsinni pisiniarfinnut tunisinnaasimavaat, naak Nunarput naatsiaanik ukiumut 1.500 tonsinik eqqussisaraluartoq.

- Siunertarinikuungaluarparput naatsiaanik ukiumut 300 tonsinik kujataani naatitsisartunit pisisalernissarput, kisianni niuertarfiit pisiniartarnitik allanngortinngippatigit naatsiaativut tuniuminaattuassapput, Knud Albrechtsen oqarpoq.

Knud Albrechtsenip ilanngullugu oqaluttuaraa Neqi A/S ukiup aappassaanut naatsiaanik igitsigisariaqarsimasoq. Siornali igitat ikinnerusimapput siornaak naatsiiarsiat ikinnerusimammata.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER