angerlarsimaffeqanngitsut
Neqerooruteqannginnera ”pilluaatissarsiortunik aallartitsisarpoq”
Isumaginninnermik politikki ilaqutariinnut politikkiutillugu inersimasunullu qitornaqanngitsunut neqeroorutinik ineqarfinnillu peqartinnagu Danmarkimut nussorneq ingerlaannassaaq Ilisimatusarfimmi ilisimatusartoq oqarpoq
Inersimasut atugarliortut Kalaallit Nunaanni pitsaanerusumik neqeroorfigineqanngikkunik Danmarkimi pitsaanersumik inuuneqalernissartik neriuutigalugu illoqarfissuarnut annernut nussornerat ingerlaannassaaq.
AG taama allappoq.
Ilisimatusarfimmi inuiaqatigiilerinermik, Aningaasaqarnermik Tusagassiornermillu Ilisimatusarfimmi sociologi Steven Arnfjord, Kirkens Korshærip nittartagaani, ”pilluaatissarsiorlutik angalasut” pillugit allaatigisamini oqarpoq.
Atornerluisut, angerlarsimaffeqanngitsut inuuniarnermikkullu ajornartorsiuteqartut Kalaallit Nunaanni inuunertik artornarsilluinnaraangat siumuinnaq billettilerlutik kujasinnerusunukartut pilluaatissarsiorlutik angalasunik taaneqartarput.
Aallaraangamilli pilluarneq tamatigut siumorneq ajorpaat.
Qallunaat akornanni nakkaativissornissamut ulorianaateqarpoq, kalaallinut ingerlalluaraluartunut allaat, kalaallit Danmarkimi inuuniarnermikkut ajornartorsiuteqartut pillugit qanittumi ataatsimiinnermi paasinarsivoq.
- Kalaallit Nunaanni isumaginninnikkut politikki meeqqanut ilaqutariinnullu politikkiugaluarpoq ukiunilu 20-ni taamaassimalluni. Tamassuma politikerit oqallissinnaanerat allaffeqarfiullu inersimasunik isumassuisinnaanera taamatullu pinaveersaartitsineq aamma 50-inik ukiulimmut imerajuttumut ukiunilu tallimani angerlarsimaffeqarsimanngitsumut tunngasinnaasoq killilertarpaa, Steven Arnfjord oqarpoq.
Tamanna pillugu AG-mi paasisaqarnerusinnaavutit, taanna uani ataani linki atorlugu pisiarisinnaavat: