ujaasineq
Naviair: Timmisartuaqqap nassaarineqarnissaa neriuutigaarput
Timmisartuaraq sisamanngormalli ujaarineqartoq suli nassaarineqanngilaq
Timmisartuaraq ataatsimik ilaasoqartoq sisamanngormalli sumiiffeerunneqanngitsoq suli nassaarineqanngilaq. Timmisartuaraq Keflavikimit Kulusuliartilluni tikingajalernerani attaveqarfigineqarunnaarpoq.
- Kulusummi sila pitsanngoriarpat Sikorsky ujaasilluni aallarteqqissaaq, Naviairip ataqatigiissaarisua Camilla Hegnsborg Sermitsiaq.AGmut oqarpoq.
- Sikorsky kisimiilluni ullumi ataasinngornermi ujaasissaaq. Ujaasineq sivitsoriartortillugu timmisartuaqqap nassaarinissaanut neriuut annikilliartorpoq, taamaattumik ullumi angusaqartoqarnissaa neriuutigaarput, Camilla Hegnsborg oqarpoq.
Search and Rescuep ujaasisarnera Kangerlussuarmit aqunneqartuuvoq. Timmisartuaraq sisamanngormalli ujaarineqarpoq. Sakkutuut timmisartuat Challenger ujaaseqataareerluni arfininngormat sapaatiummallu Danmarkimut uteqqippoq. Umiarsuit Kulusuup nalaaniittut aamma ujaaseqatigineqarput.
Challengeri Aalborgiliarluni sapaatiummat uterpoq.