annaassiniarneq

Naviair: Timmisartuaqqamik ujaasineq ingerlaqqippoq

Timmisartuaraq Tunumi ujaarineqartoq suli nassaarineqanngilaq tallimanngornermi nalunaaqutaq 19.05

Timmisartuaraq ujaarineqartoq Kulusummut sisamanngormat nalunaaquttap 18.00-p missaani tikittussaagaluarpoq

- Timmisartuaqqamik ujaasineq suli angusaqarfiunngilaq ajoraluartumik. Timmisartut tamarmik atorneqarsinnaasut atorlugit ulloq unnuarlu ujaasisoqassaaq, assinganik aqagu arfininngornermi ujaaseqqittoqassaaq pisariaqassappat. Atorneqarsinnaasut tamarmik atorlugit ujaasisoqassaaq.

Naviairip ataqatigiissaarisua Camilla Hegnsborg Sermitsiaq.AG-mut oqarpoq nalunaaqutaq 19.05.

Tunumi sila pitsaanerulerpoq. Taamaattumik qulimiguullit Sikorsky aamma Bell 212 timmisartuaqqamik ujaarlerlutik aallartipput.

Naviairip timmisartuaraq sisamanngornermi attaveqatigiunnaarpaa. Timmisartuaraq ataatsimik ilaasoqarpoq. Timmisartuaraq Keflavikkimit Kulusummukartilluni attaveqaataa kipineqarpoq, tusarfigineqaqqinnanilu.

- Sakkutuut timmisartuat Challenger Aalborgimit Kalaallit Nunaannukarpoq. Islandimi orsereerluni Kalaallit Nunaaliarpoq ujaaseqataajartorluni, Camilla Hegnsborg oqarpoq. Oqaatigisinnaanngilaa timmisartuaraq qanoq isikkoqarnersoq aamma suminngaanneersuunersoq.

Powered by Labrador CMS