saqqummerneq

Nauja Lynge: Angerlarsimaffeqanngitsutut inuunikuuvunga

Nauja Lynge naatsiiviliarsuup issiavittaani angerlarsimaffeqanngitsut allat assigalugit sinittalingajassimagaluarpoq taamatulli inuuneqarusunnani massippoq kalaallillu atugaannik pitsanngorsaaqataalerluni

Nauja Lynge namminiilivinnissamut oqallinnermi peqataavoq.

Nauja Lyngep namminiilivinnissamut oqallinnermi peqataalluarnera peqquteqarluarpoq, tassami nammineerluni Danmarkimi kalaallit angerlarsimaffeqanngitsut assigalugit peersitaasarsimavoq piitsuusimallunilu.

- Oqaluttuarerusunnikuunngikkaluarpara. Inuilli arlallit pisuujusorisarmannga inuulluataarsoralunga taamatut isigineqarnera assut uumigilerpara, Nauja Lynge tusagassiutinut saaffiginninnermini oqaluttuarpoq.

Akiliisinnaajunnaarpoq
Inuunermi aqqusaakkami ilaata oqaluttuarinissaa ajornartippaa, tassami siornatigut eqalussuit atorlugit nioqqutissiorluni suliffeqarfiutaa The Greenland Company, Namminersorlutik Oqartussanit taperneqarsimasoq akiliisinnaajunnaarpoq eqqartuussisunullu sassartinneqarluni.

Akiliisinnaajunnaarnerup kingorna Danmarkimi angerlarsimaffeqanngitsut atugaat assigalugit inuulersimanini oqaluttuaraa.

- Ukiuni tallimani kalaallit angerlarsimaffeqanngitsut assigalugit piitsuullunga inuuvunga. Imminut toqunnissara eqqarsaatigisarsimavara. Naatsiiviliarsuarmili allat assigalugit sinittalinngilanga, nakkaqqanikooqaangali. Inuuneq taamaattoq toqqutigerusunnagu iliuuseqarniarlunga aalajangerpunga. Kjole kusanartoq ateriarlugu kukikka taneriarlugit borgmesteri imaluunniit kalaallit Danmarkimiittut pillugit apersorneqassatillunga Christiansborgiliartarpunga, siorna marsimi eqalussuit atorlugit nioqqutissiornermi aallarnisaasuusimasoq eqqartuussaanermilu ajugaasimasoq oqaluttuarpoq.

Pisinnaatitaaffiit periarfissanik ammaassinngitsut
Taamanikkut qanoq periarfissaqanngitsiginini paasivaa.

- Kalaallit Danmarkimiittut danskit innuttaassuseqartut allat assigalugit atugaqartitaapput. Taamaattorli taakkutuulli periarfissaqartinneqanngilagut. Tamannali angutserlugu uteriinniarpunga, Nauja Lynge aalajangersimarpasilluni oqarpoq.

Tassungalu atatillugu namminersulivinnissamut oqallinnermi akuleruttuarpoq.

- Isumaqarpunga (namminersulivinneq aaqq.) kalaallinut iluaqutaanavianngitsoq. Akerlinganimmi pikkorivissut ikitsunnguit inuulluataalissagamik. Taamaammat namminersulivinnerup malitsigisassai innuttaasunit ilisimaneqartariaqarput. Taakkulu paasineqareerpata aatsaat siunissamik patajaatsumik pilersitsisoqarsinnaalissaaq, Nauja Lynge isumaqarpoq.

Powered by Labrador CMS