akunnattoorut

Nationalbankip Nuummi suliniutit annertuut marluk navianartoqarnerarpai

Nationalbankip Kalaallit Nunaata Aningaasaqarneranut misissueqqissaarnerani kingullermi illoqarfiit pingaarnersaanni sanaartornermut suliniutit annertuut ataatsikkut ingerlanneqarniarnerat navianartoqartippaat.

Siorarsiorfik
Den store byudviklingsplan, Siorarsiorfik, i Nuuk sammenholdt med planerne om en udvidelse af lufthavnen får alarmklokkerne til at ringe hos Nationalbanken.

Nuummi illoqarfiup ineriartortinneqarnissaanut pilersaarut annertooq inunnut 5000 missaani inissianik, atuarfeqarfinnik paaqqinnittarfinnillu imaqartoq mittarfiulli allilerneqarniarnera, Nationalbankip økonomiannit navianarsorineqarpoq.

Imminut akilersinnaanersoq ujartorneqarpoq

- Kommuni suliniummut aallarnisaasuuvoq, suliniutillu OPP-tut, tassa pisortat namminersortullu suleqatigiinnerisigut suliniutip ingerlanneqarnissaa eqqarsaatigineqarluni. Aningaasanik milliardinik arlalinnik naleqassangatinneqarpoq. Mittarfiit assigalugit suliniutit imminnut akilersinnaaneri pivisusunngortinnissaannut pingaaruteqarput, aningaasaliissutaasussat kisiisa eqqarsaatiginagit, misissueqqissaarnermi allassimavoq.

Misissueqqissaarnermik allaaserinnittoq Anders Møller Christensenip allatut ima nassuiaateqarpoq:

- Aningaasartuuteqarpallaarneq kalaallit aningaasarsiorniarnerannut massakkut navianarnerpaavoq, Anders Møller Christensen Sermitsiaq.AG-mut oqarpoq.

Namminersorlutik Oqartussat aningaasaqarneranut sioranartoq

Suliniutit inissialiornermut akunnattoortitsisinnaasoq, økonomit ilimagaat, tamannalu Namminersorlutik Oqartussat aningaasaqarniarneranut toqqaannartumik toqqaannanngitsumilluunniit kinguneqarsinnaavoq.

- Mittarfiit illoqarfimmillu ineriartortitsinissaq ataatsikkut piviusunngortinniarneqassappata qularnanngilaq suliaqarfinni allani akunnattoortitsissasoq aningaasartuutillu qaffannissaannik kinguneqassalluni, tassami Danmarkimi Islandimilu sanaartorneq annertuumik ingerlanneqarmat. Sanaartornissamik suliniutit annertuut Namminersorlutik Oqartussanut toqqaannartumik toqqaannanngitsumilluunniit aningaasaqarnikkut sunniuteqarnissaat ilimanaateqarpoq aningaasartuutit qaffannerisigut, ingammik suliniutit aningaasatigut imminnut ataqatigiinngippata.

Politikkerinut siunnersuut: Utaqqigitsi

- (Sanaartornissamut) suliniutigineqartut annertuut aningaasalersorneqarnissaasa inissinneqarnissaat politikkerit utaqqimaartariaqaraluarpaat. Politikkerit aalajangiiniartillutik aningaasaqarnikkut imminnut akilersinnaanersoq eqqarsaatigineqartarnissaa pingaaruteqarpoq. Ingammik namminiilivinniarluni eqqarsartilluni. Suliniutit annertuallaalersinneqassanngillat, Nationalbankip misissueqqissaarnera allattoq Anders Møller Christensen naqissusiivoq.

Powered by Labrador CMS