Pinngortitami ikuallattoorneq
Nassuttuup eqqaani ikuallattoqarpoq
Qaasuitsup Kommuniani Attup kangiani pinngortitami ikuallattumik naammattuuisoqarpoq.
Ilulissani politiit, Qaasuitsup Kommuniani Upalungaarsimasuutitat kommunillu pisoq qanimut malinnaavigaat, Air Greenlandimiillu timmisartuanit qulaavaatitaanik assinik nassinneqartarlutik, upalungaarsimasuutitat, Ilulissani politiit aamma kommuni paasissutissiipput.
Nalunaarutiginninnerit arlallit
Politiit sillimasui piffimmi ikuallattoq pillugu piniartunit arlalinnit nalunaarfigineqarsimapput.
Piffimmi ikuallutumik takunnissimangaanni politiit sillimasuinut attaveqartoqarnissaanik qinnuiginnipput, oqaraasuaammut 701448, assinillu aamma uunga nassiussisoqarsinnaavoq grl-ilulissat@politi.dk.
Ulluni arlalinni nunap panersimanera pissutaalluni nunami ikuallattoqarnissaa ilimanarluinnarpoq. Tamanna pissutigalugu innuttaasut immikkut innermik atuinertik sillimaffigissangaat qinnuigineqarput.