Nassuttuumi suli ikuallattoqarpoq

Nassuttuumi suli ikuallattoqarpoq, ikuallattulli siammartinnissaa pinaveersaartinniarlugu qatserisartut qatserisartoqarfinniit marlunnit sulisinneqarput. Qaasuitsup Kommuniani Upalungaarsimasuutitat tugassiuutinut nalunaarummi allapput.

Sumiiffinni atsissumi imermik pilersuiffiusinnaasumiit ikuallanneq qamisarniarneqarpoq. Ivikkani avalequtinilu amaarnerata malitsigisaanik ikuallanneq annertuumik pujuliorpoq.

Sumiiffimmi uumasunik takunnittoqarsimanngilaq taamaammat inuit, uumasut illullu ikuallannermit navianartorsiunngillat.

Qaasuitsup Kommuniani sapaatip akunnerata ingerlanerani allanik marlunnik nunami ikuallattoqarsimavoq, taakkuli qaminneqareersimapput.

Qaasuitsup Kommuniani ulluni kingullerni siallersimanera pissutigalugu, illoqarfiit nunaqarfiillu avataanni innermik atuineq pujortarnerlu inerteqquteqarnerit Qaasuitsup Kommuniani Upalungaarsimasuutitaannit atorunnaarsinneqarpoq.

Innermik atuinermut pujortarnermulli inerteqquteqarneq massakkut atorunnaarsinneqaraluartoq, nunamiitilluni innermik atuineq pujortarnerlu mianersuunneqartariaqartoq Qaasuitsup Kommuniani Upalungaarsimasuutitat kaammaattuutigaat.

- Killut ikumasut qimanngisaannakkit, pujortakkalluunniit ikumatillugu nunamut iginngisaannarlugu. Ingalaamernit katersortarsigit, taakkummi seqernup qinngorneranit ikuallannermik pilersitisisinnaapput, upalungaarsimasuutitat allapput.

Innuttaasut ikuallattunut ilisimasallit apeqqutissaqartullunniit Kalaallit Nunaani Politiit oqarasuataannut 70 14 48-mut sianernissaat Qaasuitsup Kommuniani Upalungaarsimasuutitaannit qinnuivigineqarput. Innuttaasut apeqqutissaqartillutik annaassiniartartunut attaveqannginnissaannik qinnuigaangut, sianernerimmi oqarasuaatinut allanut mattussisarmata.