Nassatanik tigummiaannakkanik nassarsinnaanerulerpugut

Aallalernermi nassatanik allanik tunniussisoqarsimanngippat timmisartumut tigummiaannagassat 15 kiilu nassarneqarsinnaalerput. Air Greenlandip Kalaallit Nunaanni angalasunut ikiorsiiniarluni maleruagassani allanngortippai.

Kalaallit Nunaanni amerlasuut amerlanngitsunik nassataqarlutik angalasarput, ilaatigullu pisariaqanngikkaluartoq nassatat tunniunneqartariaqartarlutik. Taamannak angalasartut ikiorserniarlugit februaari aallarnerfigalugu nassatat tigummiaannagassat 15 kiilu timmisartumut nassarneqarsinnaalerput, taamaaliortoqarsinnaavorli aatsaat nassatat allat tunniunneqarsimanngippata.

- Taamaattumik Air Greenland nassatanik allanik tunniussinngikkaanni, nassatat tigummiaannakkat 15 kg-t tikillugit nassarsinnaanissamut periarfissamik atulersitsivoq. Nassatat tigummiaannakkat timmisartutta amerlanersaanni timmisartup iluanut nassarneqarsinnaapput, qulimiguulillu angallaviisa ilaanni timmisartumut ikinermi pilotimut imaluunniit usilersuisartumut tunniunneqassapput, qulimiguullillu aquanut ikineqassallutik. Tikinnermi nassatat qulimiguullip aquaniit tunniuteqqinneqassapput. Timmisartumi qulimiguulimmilu nassatat tigummiaannakkat 55 x 40 x 23 cm-init annerussanngillat, Air Greenland nalunaaruteqarpoq.

Ilaasunut allanut tunngatillugu nassatat 20 kiilut tikillugit aammalu nassatat tigummiaannakkat 8 kiilut nassarneqarsinnaapput. Nanoq Classimi angalasut nassatat 30 kiilut tunniunneqarsinnaapput aammalu nassatat tigummiaannakkat 8 kiiluusinnaallutik.