Nassaartortup suliffeqarfini Danmarkimut nuunniarlugu aalajangertoq

- Maani Nunatsinni tapersersorneqarniarneq ajornakusoortorujussuuvoq. Taamaammat suliffeqarfiup Danmarkimut nuunneqarnissaa pitsaanerpaassasoq nalilerparput.

Attavimmik pilersitsisoq aamma pisortaq, Poul Jørgen Holm, Sermitsiaq.AG-mut taama oqarpoq. Attavik mobilinik inerisaasartunut nunanit tamalaaneersunut nersornaasiuttakkamut innersuunneqarpoq, suliffeqarfillu aamma siorna Singaporemi aamma Kuala Lumpurimi nersornaasigaavoq.

- Suliffeqarfik Nunatsinniitiinnarusukkaluarpara, nunamik ineriartortitseqataarusukkama. Kisianni Nunatsinni tapersersorneqarusunngikkutta suliffeqarfik nuuttariaqarparput, Poul Jørgen Holm oqarpoq, taassuma Nunatsinni najugaqaannarnissartik naqissuserpaa, kisianni suliffeqarfik Danmarkimut nuunneqassalluni.

Atuaruk: Kalaallit nersornaaserneqarsimasut nunanit tamalaaneersunit innersuunneqartut

Ineriartorneruniartoq
IT-mik ineriartortitsinermik ilisimasaqannginneq, Kalaallit Nunaanni aporferujussuusoq taanna oqarpoq.

- Suliniutigut apeqquserneqartuaannarput. Suliagut saqqummiukkaangatisigit suli angusagut suli naammannginnerarneqartarput. Suliagullu aningaasatigut tapiissuteqarfigineqarnissaat pisariaqarmat, suliaq Kalaallit Nunaata avataani ingerlakkutsigu pitsaanerussasoq nalilerparput. 2014-imili tassani inissisimaffimmiilerpunga, Attavimmilu ineriartoqqikkusukkatta aallartariaqarpugut, Poul Jørgen Holm oqaluttuarpoq.

Taassuma 'ineriartortitsinissamut tapiissuteqartarneq' Nunatsinni apeqquserpaa.

- Suliniutigut ineriartortissagutsigit aningaasanik nammineq nassaarniartuaannarpugut. Taamaammat aallarnisaareerluni naammassisaqaleraanni aatsaat aningaasanik tapiiffigitissinnaaneq ataqatigiinngillat. Aallartinnermi ajornakusoortumi tapiissutinik amigaateqartoqartarpoq. Taamaattumik ineriartortitsinermut tapiissutaajunnaarsimavoq, 'ineriartortitsereernermi akissarsiatut' taarusunneruara, taanna oqarpoq.

IT-mik suliniutinut taamaattunut ilisimasaqannginnermut tamanna attuumassuteqarsinnaasoq, Poul Jørgen Holm oqarpoq.

- Aallartinniarluni sulineq aamma suleqatissarsiorluni ineriartortitsinerullu aallartinniarneqarnera qanoq annertutiginersoq. Taamaammat siunissami allanut nassaartorusuttunut ajornannginnerussasoq neriuppunga. Maani Nunatsinni aalisarneq takornarialerinerlu kisiisa pikkoriffiginngilagut. Neriuppunga nassaartortunut tulliuttunut aqqutissiuillunga, taanna oqarpoq.

Utaqqisinnaajunnaartoq
Nunani allani tapiissuteqarfigineqarnissaq ajornannginnerusoq, Poul Jørgen Holm oqarpoq.

- Maani Nunatsinni ikinngutitsinnit nalunngisatsinniillu tapersersorneqarpugut, tamannalu qujamasuutigisorujussuuarput. Taakku suliniuterput upperaat. Kisianni allaninngaanniit tapersersorneqarnissaq ajornakusoorneruvoq, Nunatsinni uagutsitut sulisut amerlannginnamik.

- 2014-imi tapiiffigineqarsimasuugutta, immaqa nioqqutigut tunisassiarilereersimassagaluarpagut, imaluunniit suliffeqarfipput tunereersimassagaluarparput. Taamaammat utaqqisinnaajunnaarpugut, suliffippullu Danmarkimut nuullugu, Poul Jørgen Holm oqarpoq.