Nasap issittumi robot-ia misilitsinnermini siullermi angusivoq

Issittumi robot-i Grover ilisimatuut USA-mi Maryland-imi sissami kingornalu Idaho-mi apummi misilereersimagaluaraat pissanganarsimavoq Nasap robot-iata, Boise State University-mi ingeniøritut ilinniagaqartunit sananeqarsimasup, Sermersuarmi siullermeertumik misilinneqarnini naammassissaneraa.
Aamma atuaruk: Nasap robot-ia Sermersuarmi
Kalaallit Nunaanni misilinneqarneratigut ilaatigut paasiniarneqarpoq robot-i ungasissumit, satellitsi atorlugu Nunatsinni Summit Camp-imiittoq, naalakkersorneqarsinnaanersoq. Tamannalu iluatsippoq. Robot-i silarluttumi atorluarsinnaavoq, issittumi anorersuartumilu, misileraanerup tamanna takutippaa.
Robot-i sapaatit akunnerini tallimani Sermersuarmi ingerlaarnermini sermeq pillugu paasissutissanik nalunaarsuillunilu katersuivoq, taamatut paasissutissiivoq Nasa-gov.