arsaattarfiit nutaat
Narsaq, Qaqortoq Nanortalillu ivigaasanik arsaattarfittaassapput
Kommune Kujalleq sanaartugassanik suliaqartartumut isumaqatigiissusiorpoq, taanna arsaattarfinnik ivigaasanik qallikkanik Narsami, Qaqortumi Nanortalimmilu suliarinnittuussaaq. Arsaattarfiit ukiormanna piareerneqarnissaat naatsorsuutigineqarpoq.
Inuit arsaannermik nuannarisallit Narsami, Qaqortumi Nanortalimmilu ivigaasanik qallikkanik arsaattarfinni arsarsinnaanngungajalerput.
Tassami Kommune Kujalleq sanaartugassanik suliaqartartoq HEE Entreprise A/S isumaqatigiissuteqarfigeqqammerpaa, ingerlatseqatigiiffik taamaalilluni illoqarfinni taakkunani pingasuni ivigaasanik qallikkanik arsaattarfiliussaaq.
- Ulloq nuannersoq
- Kommune Kujallermut innuttaanullu arsaannermik arsaattulerinermillu nuannarisaqartunut ullumikkut ulloq nuannersuuvoq, kommunimmi sivisuumik kissaatigisimavaa innuttaasuminut inuusuttunut allanullu isikkamik arsaannermik nuannarisalinnut periarfissarititaasut pitsanngorsarneqarnissaat, maannalu tamanna iluatsittussanngorpoq, borgmesteri Kiista P. Isaksen (S) nuannaarluni unnersiorpoq.
HEE Entreprise A/S-ip sulineq ukioq manna aggustip aallartinnerani aallartinniarlugu naatsorsuutigaa.
Arsaattarfik siulleq ukioq manna naammassineqassangatinneqartoq tassaavoq Narsami arsaattarfissaq, ukiortinnagut arsaattarfissat tamarmik naammassineqarsinnaassasut naatsorsuutigineqarpoq.