Narsaq
Narsap Atuarfiani aserorteqisoqareersoq matugallarneqartoq
Atuarfimmi eqqiaasoqarnera pissutigalugu Narsami Atuarfik matoqqatinneqarallarpoq ataasinngormat. Atuarfimmi ilaatigut qatserutinik aserorterisoqarpoq akunnerup naanerani. Inuusuttuaqqat marluk atuarfimmi aserorterisimanertik nassuerutigaat
Narsap Atuarfiani atuartut atuanngiffeqartinneqarput ataasinngormat aserorterisoqareernerata kingorna. Inuusuttuaqqat atuarfimmi aserorterisimapput akunnerup naanerani, ilaatigut katserutinik atuarfiup iluani seqqartaasimallutik.
Kujataani politiit pisortaat Bent Ole Kleist Sermitsiaq.AG-mut oqaluttuarpoq.
- Atuarfimmi aserorterisoqarsimaneranik Narsami politiit sapaatiummat nalunaarfigineqarput. Nukappissat 15-nik aamma 16-nik ukioqartut pisiniarfimmi tillinniariaraluarsimasut tigusarineqarput, Bent Ole Kleist oqarpoq.
Atuarfimmi nukappissat kamippaasa tumai politiinit ilisarineqarput, pisiniarfimmi tillinniariaraluarnerannut atatillugu kamippaasa tumai assigimmassuk.
Inuusuttuaqqat taakku Narsami arlaleriarlutik aserorteralutillu tillinniartarsimasut Bent Ole Kleistimit oqaatigineqarpoq.