Narsami suliffissaaleqinerujussuaq iliuuseqarfiginiarneqarpoq

Narsami suliffissaaleqineq pillugu qanittumi isumasioqatigiittoqarmat inerniliunneqarpoq suliffissaaleqinerujussuaq anigorneqassappat aalisakkerinermik suliffissuaqarneq uterfigeqqinneqartariaqartoq.

Isumasioqatigiinnermi, tallimanngormat naammassineqartumi, suliffiutillit, politikerit, suliffissaaleqisut kiisalu Namminersorlutik Oqartussanit kommuunimilu atorfilittat peqataapput.

Illoqarfimmi suliffissanik nutaanik pilersitsinissamut periarfissat eqqartorneqarsimapput, nunaateqarneq aatsitassarsiornerullu ineriartortinnissaat periarfissaangaluartoq, inerniliunneqarpoq illoqarfiup uummarsarnissaanut aalisakkerinermik suliffissuaqarneq aqqutissaasoq.

Taama Kommune Kujalleq tusagassiuutinut nalunaaruteqarpoq.

Atuaruk: Naalakkersuisut Narsami 'immikkut ittumik' suliniuteqartut

Saarullik Kujataanut uteqqippoq
Narsami illuutinik isaterinissamut, iluarsaassinissamut allilerinissamullu 50 millioner koruunit sinnerlugit Naalakkersuisut immikkoortitsipput.

- Saarullik imartatsinnut uteqqinnikuuvoq, tamannalu takuneqarsinnaavoq ningittagarsuutit avatitsinni aalisareerlutik pilertortumik immerluarsimallutik utertaneranni, Simon Simonsen, Kommune Kujallermi inuussutissarsiornermut suliffissaqartitsiniarnermullu ataatsimiisitaliami siulittaasoq ilisimatitsivoq.

Kujataanut tulaassuisussaatitaaneq kissaatigaat
Kommune Kujallermi politikerit, partiit akimorlugit, kissaatigaat Kujataani saarullittassiissutigineqartartut ukkatarineqarnissaat, tamatumani siunertaralugu pisassat amerlineqarnissaat kiisalu selskabinut pisassiinermi Kujataani tulaassiutigaluni tunisassiornissamut pisussaaffilerneqarnissaat eqqarsaatigalugu.

Isumasioqatigiinnermi isumaqatigiissutigineqarpoq aammaarluni saarullittassat tunitsiveqarnerlu pillugit isumasioqatigiittoqassasoq, tamatumuuna Nanortalimmi inuussutissarsiornermut ataatsimiisitaliap aapriilimi ataatsimiinnissaa iluatsillugu.