nersornaasiineq
Narsami politeeq nersornaaserneqartoq
Kalaallit Røde Korsiata ikiueqqaarnermi nersornaasiuttagaa tallimanngormat ualikkut politiassistent Jens Thorinimut tunniunneqarpoq Narsami byrådssalimi katerisimaarnermi
Jens Thorin tallimanngormat Kalaallit Røde Korsiata nersornaasiuttagaanik Narsami tunineqarpoq, tamatumunngalu pissutaavoq aasaq Uummannap eqqaani ajutoortoq annaassimammagu.
Jens Thorinip pisimasoq nuanniitsoq oqaluttuaraa, tassa juulip 27-anni nalunaartoqarsimasoq umiatsiaaraq illoqarfimmit 2-3 kilometerinik ungasissusilimmiilluni kinngusimasoq. Tamanna pivoq Uummannami politiini sulinerani.
Tuaviinnaq umiarsualiviliarpoq tassanilu aalisartoq Edvard Nielsenilu taassuma angallataanik ajutoorfimmukarput. Inuit arfinillit imaaniittut naammattoorpaat ingerlaannarlu annaannialerlugit, tamakkualu ilagaat niviarsiaraq 9-nik ukiulik, taannalu sukkasuumik ikiueqqaarnermikkut uummarteqqippaat.
Kinguninngua umiatsiaaqqat amerlanerit takkupput, Jens Thorinillu taamatut ikiuuttoqarnera qujamasuutigaa.
Sukkasuumik orniguttoqaraluartoq ajoraluartumik pingasut ajunaarput.
Iliuuseqarsimanera pissutigalugu Kalaallit Røde Korsiata tallimanngormat Jens Thorin ukiumi ikiueqqaarnermut nersornaammik 5.000 koruuninik aningaasartalimmik tunivaa, taannalu Kommune Kujallermit Suka Frederiksenimit tunniunneqarpoq.
Ilanngullugu oqaatigineqarpoq Uummannami aalisartoq Edvard Nielsen aamma tallimanngormat nersornaaserneqarsimasoq 5.000 koruuninik aningaasartalimmik.