Narsaq
Narsami Pilersuisoq inuusuttut ingerlatilerpaat
Kujataani illoqarfimmi Pilersuisup pisiniarfiani pisortamik nutaamik pisortallu tullianik atorfinitsitsisoqarpoq. Narsami pisisartunik unammineq sakkortusivoq
Narsami Pilersuisumi suleqatigiit inuusuttut ineriartorneq ilorraap tungaanut saatissavaat.
Illoqarfimmi Pilersuisup 26-nik ukiulik Thomas Kristoffersen pisiniarfup pisortaatut atorfinitsippaa Asiarpa R. Olesenilu, 31-nik ukiulik, pisortap tulliatut atorfinitsillugu.
Marluullutik eqqortunik piginnaasaqarput Pilersuisup kujataani pisiniarfiisa annersaanni siuariartornermik annertunerusumik pilersitsinissamut.
Taamatut Pilersuisoq tusagassiorfinnut nalunaarutikkut allappoq.
Unammilligassat
Pisiniarfiutileqatigiiffiup pisortaata Finn Fabriciusip, nunaqarfinni illoqarfinnilu qulingiluani pisiniarfinnut 66-inut pisortaasup, isertuutinngilaa unammilligassaqartoq Pilersuisup sunnersinnaasimanngisaanik, assersuutigalugu illoqarfinnut anginerusunut nutsernerit, taamaapporlu aamma Narsami.
Qularutiginngilaali inuusuttut suleqatigiit, pisiniarfimmik ingerlatsinermik misilittagaqarluartut aammalu sulisut kajumissuseqartinnissaasa pingaaruteqassusianik ersarissumik isummallit, pitsaasumik angusaqarumaartut.
– Pilersuisumut pingaaruteqarpoq ingerlatsinikkut niuertarfimmik silatuumik ingerlatsinissap tamatigut sammineqarnissaa. Pisisartut sorsuutigineqarput, qularutiginngilaralu qullersat inuusuttut, ilanngullugu kujataani tuniniaanermut pisortaq Arne Lyberth Petersen, ersarissumik isumassaqartut Narsami pisisartut kajungilersinnissaannut suut pisariaqarnersut, Finn Fabricius oqarpoq.