Nationaldag
Narsami oqalugiaat: Kalaallit tulluusimaartuunissarsi eqqaamallugu
Inuiattut ullorsiornermi tallimanngormat ullaakkut pingaarnerusutut oqalugiarnermi oqaluuserineqarput ataqatigiinneq, kalaaliunermik tulluusimaarutiginninneq imminullu ikiornissaq susassareqatigiinnissarlu
Ullaaq pujoqaluni nillerujukkaluartoq inuiattut ullorsiornerup nalliussineqarnerani Narsaramiorpassuit takkupput. Pisarnertut amerlatiginngillat, taamaakkaluartorli untritillit missaanniillutik.
Kommunalbestyrelsimut ilaasortat Avaaraq Olsenip Benjamin Kielsenillu erfalasut marluk amuvaat.
Tamatuma kingorna Kommune Kujallermi borgmesterip tulliata aappaa Avaaraq Olsen oqalugiarpoq, oqalugiaatigalugit ataqatigiinneq, kalaaliunermik tulluusimaarutiginninnissaq aammalu imminut ikiornissaq susassareqatigiinnissarlu.
Immikkut qutsaveqarfigai inuit, innuttaaqatiminnik suliniuteqartut, namminneq inuttut imaluunniit peqatigiiffiit assigiinngitsut aqqutigalugit.
Inuit tamakkua suliniuteqarsimanngitsuuppata, angajoqqaamiikkallarnerminni minnerunngitsumillu ullutsinni, inuiaqatigiit taama angusaqartigisimanavianngikkaluarput, Avaaraq Olsen oqarpoq. Naggataatigut kalaallit tamaasa, nunarsuarmi sumiikkalluartulluunniit, inuiattut ullorsiorluarnissaannik kissaappai.
Tamatuma kingorna kommuni silami ullaakkorsiortitsivoq rundstykkinik, kaffimik tiimillu.
Nalunaaqutaq 9.00 puisinniarnermik unammisitsineq aallartippoq, angallatit arfineq pingasut aallarmata. Nalunaaqutarlu 10.00 naalagiartoqarpoq palasi Jens-Jørgen Hansen oqaluussisoralugu.
Ualeru, neriunartumik pujuereersimappat, katersortarfiup tunuani Kuukasiup eqqaani killutigut ataatsimut igasoqassaaq assigiinngitsunik aliikkusersuinertalimmik unammisitsinermillu.
Inuiattut ullorsiornermit assit allaaserisallu tamaasa takukkit uani