Assit
Narsami nerisassiornermik festivalertitsineq
Narsami nerisassiornermik festivalertitsineq aallartilluarpoq
Nerisassiornermik festivalertitsineq silami ingerlanneqartussaagaluaq, siallernera pissutaalluni timersortarfimmi ingerlanneqartariaqarsimavoq. Aamma puisimik siatsineq taamaatiinnarneqarpoq, illup iluani siatsinissaq qatserisartunit akuerineqanngimmat.
Naak piareersaatit eqqorlugit aaqqissuisoqanngikkaluartoq Narsarmiorpassuit nerisassioriaatsinik assigiinngitsunik takusaqarput, nerisassanillu aamma misileraallutik.
Kommunalbestyrelsimi ilaasortap Siumumeersup Karla Bisgaardip nerisassiornermik festivali ammarpaa.
Puisi-medisteri
Narsami aaqqissuussineq Inuilimit kiisalu kommunimi inuussutissarsiornermut immikkoortortaqarfimmit aaqqissuunneqarpoq. Nerisassiat assigiinngitsut sassaalliutigineqarput, kiisalu puisi-medisteri akikitsunngorlugu tuniniarneqarluni.
Nerisassiornermik aaqqissuussaq kisimi ingerlanneqanngilaq, tassami aamma Inatsisartunut ilaasortaq Suka Frederiksenip illoqarfimmi aserorterisoqartannginnissaa anguniarlugu suliniutaa 'Narsaq Nuannareqaara' aamma orniguffigineqarsinnaammat.
Atuartut
Piareersarfimmi atuartut aamma Brugsen Narsaq suleqatigiillutik aalisakkamik suppimik sassaalliipput, kiisalu kapisilimmik aamma sassaalliillutik.
Hotel Narsaq aamma peqataavoq, taakkualu iffiukkanik kiisalu raaja-burgerimik tuniniaapput.
Aamma nerisassiornermik unammisitsisoqarpoq.
Aalisartoq piniartorlu Jens Davidsen, Piareersarfimmi atuartoq Tanje Geisler kiisalu Axel Møller aamma Benedikte Vahl unammipput.
Tassani Jens Davidsen ajugaavoq, Tanja Geisler aappaattut inissittoq.
Katersortarfimmi aqagu marlunngornermi nerisassiornermik festivali ingerlanneqaqqissaaq.