Kujataa
Narsami inussutissarsiorneq ajutoorluinnalersoq
Narsami suliffeqarfiutillit aningaasatigut aatsaat taama ilungersunartorsiortigipput. Illoqarfimmi suliffissaaleqisut amerliartorput innuttaasullu amerliartuinnartut sumiiffinnut allanut nuuttarlutik
Narsami siunissami inuussutissarsiornerup unittoorluinnarnissaa ernummatigineqarpoq. Narsami ukiut siuliini inuussutissarsiorneq pitsaalluinnartumik ingerlanikuugaluarpoq, ilaatigut Royal Greenlandip suliffissuaataa raajaleriffiugallarmat inuppassuarnik suliffissaqartitsinikkuulluni.
Suliffissuarli 2013-imi raajaleriffittut atorunnaarsinneqarmat, aalisakkanullu tunitsiviinnanngortinneqarluni, tamanna inuussutissarsiornermut sunniuteqarnerluppoq.
Jan Hansen, 69-inik ukioqartoq, ukiut 50 sinnerlugit Narsami najugaqarnikuusoq, Narsaq Auto- og VVS Aps-imik ukiuni 30-ni ingerlataminik piginnittuuvoq.
Suliffeqarfik suliassaqarluarluni pitsaasumik ingerlajuarsimagaluartoq, ilaatigut Narsami Permagreenimik suleqateqarluarnera tunngavigalugu, maannakkut suliassaaleqivoq. Tamannalu pissutaalluni suliffeqarfimmi sulisut ikilisarneqartariaqarsimapput. Ruujorilerisut marluk, mekanikeri ataaseq maannakkut aalajangersimasumik ilaatigut ullup affaannaani kisiisa sulisorai, naak siornatigut ruujorilerisut marluk mekanikerillu pingasut aalajangersimasumik sulisorineqartarsimagaluartut.
- Inuussutissarsiorneq aningaasaqarnerlu eqqarsaatigalugit ukioq manna suna tamarmi ammut ingerlasoq malugaarput, tamatumunngalu innuttaasut amerlaqisut illoqarfimmiit nuussimanerat ilaatigut pissutaavoq, Jan Hansen oqarpoq.
Allaaserineqartoq tamaat Tamanut Kujataanimi atuarneqarsinnaavoq. Kommune Kujallermi pisut assigiinngitsut aviisimi aamma atuarneqarsinnaapput. Aviisi tamakkiisoq ataani akeqanngitsumik aajuk: