immiorfik

Narsami immiorfik ingerlanneqaqqilerpoq

Nunatsinni avammullu tunisassiornissaq pilersaarutigineqarpoq

Fridrik Magnusson immiorfiup ingerlalernissaa sulissutigaa

Nanoq Beerip ukiut marluk matuma siorna akiliisinnaajunnaarluni matoreersoq, Narsami immiorfeqaqqilerpoq.

Hotel Narsami ingerlatsisut Kattie Nielsen aamma Fridrik Magnusson immiorfik pisiaraat. Assigiinngitsunik immiortarnissartik pilersaarutigaat.

- Nunatsinni avammullu tunisassiornissarput pilersaarutigaarput. Kalaallit Nunaanni aalajangersimasunik tunisaqartaraluartoq aamma allaanerusunik immiortalissaagut, Fridrik Magnusson oqarpoq.

Tulummik immiortartumik qaammammi matumani Narsaliartoqassaaq.

- Ukiumi affarmi atorfinitsinneqarallarpoq, neriuutigaarpullu illoqarfimmiunik immiortoqalerumaarluta, ilisimatitsipput.

Pingajussaa
Illoqarfimmi pingajussaa immiorfimmik ammaasoqarpoq.

Salik Hard Greenland Brewhouse pilersinnikuuaa, 2006-mi siullermik tunisaqarluni.

Sermersuarmit imeq tassani atorneqarpoq, kisianni aningaasaqarneq pissutigalugu 2010-mi matuvoq.

Gerhardt Petersen aamma Jørgen Wæver Johansen immiorfimmik ukioq taanna pilersitsiput suliffeqarfik Nanoq Beerimik atserlugu.

Kalaallit Nunaanni tunisassiornissaq anguniarneqarsimagaluarpoq, kisianni Namminersorlutik Oqartussanit piumasaqaatinik iluatitsinngitsoorluni.

Nanoq Beer 2013-mi akiliisinnaajunnaarluni matuneqarpoq.

Neriulluarneq
Immiorfiup ingerlalluarnissaa Fredrik Magnussonimit neriuutigineqarpoq.

- Tunisassiornissamut Islandimi attaveqalereerpugut, ingerlalluarnissarpullu neriuutigaarput, oqarpoq.

Imerniartarfinni neriniartarfinnilu tunisassiornissaq siunnerfigineqarpoq.

- Piumasaqaatigineqartulli siullermik suliarineqaqqaassapput. Sulineq aallartereerpoq. Suliffeqarfik suli atserneqanngilaq, immiugassat sorliussanersut suli aamma aalajangiunneqanngillat, Fredrik Magnusson oqarpoq.

Powered by Labrador CMS