Narsaq
Narsami atuartut aamma atuarfik nutaaq
Meeqqat quarsaartut ittoortullu 26-t nutaat, Narsami atuarfimmi sanaartorneqaqqammisumi atuarnertik ullumi ataasinngornermi aallartippaat
Atuarfiup ilassutaani nutaami atualertoqarpoq.
Atuarfiup pisortaa Ivalo Motzfeldt takisuumik oqalugiaateqarpoq, ilaatigut atualertut 26-t nutaat ukiuni qulini atuartussanngorlutik ullumikkut ullormi aallartittut ajoqersuuppai.
Ilikkagassat tunngaviusut
- Atuarnerup inersimasunngornissamut ilinniartissavaasi, tassa imaappoq, ullut tamaasa piffissaq eqqorlugu atuariartortarnissarsi ilikkassavarsi, atuagaasivissi aamma aqerluusaasivissi nassarlugit, atuarnermilu aatsaat oqaloqquneqartillusi oqaluttarnissarsi eqqaamassavarsi.
Ivalo Motzfeldtip saniatigut oqaatigaa, illoqarfiup atuarfittaava kamippaqarfigeqqusaanngitsoq, atuartitsinermullu isertinnani kamippaat peerneqaqqaartassasut.
Atit taagorneqarnerisa kingorna atuartut tamarmik erfalasuaqqanik tunineqarput, ilinniartitsisutillu ininut atuartitsiffiusunut angisuunut iseqatigaat, angajoqqaatik, ittukkut ningiukkut ilaquttatillu malitsigalugit.
Siornarnit atuartut amerlanerusut
Akunnerup affaa qaangiuttoq atuarneq siulleq naammassineqarpoq, atuartullu silami ataatsimut assilineqarput.
Atuarfiup allaffiata ilisimatitsissutigisimavaa, Narsami atuartut nutaat 26-t aallartissasut, taakkulu siorna atualertut amerlaqatigigaat, atuarfillu katillugu 221-inik atuartuuteqartoq.
Narsaq pillugu allaaserisat tamaasa takukkit