ujaasineq
Narsami aalisartoq 63-nik ukiulik toqungasoq nassaarineqartoq
Aalisartup toquneranut pinerluttuliortoqarsimaneranik takussutissaqanngitsoq, politiit paasissutissiipput
Annonce
63-nik ukiulik Johannes Jensen, Qaqimik taaneqartartoq, sisamanngormat Narsap eqqaani umiatsiaani toqungasoq nassaarineqarpoq.
Nuummi Politiini pingaartuuneq Katrine Sandgreen Sermitsiaq.AG-mut paasissutissiivoq.
- Toquneranut atatillugu pinerluttuliorsimasoqarneranik takussutissaqanngilaq, umiatsiaalu ajoqusersimanani, Katrine Sandgreen, suliamut annertunerusumik oqaaseqarsinnaanngitsoq, oqarpoq.
Atuaruk: Ujaasinerit marluk ingerlanneqartut
Angutip inuusuttup aqisserniartup 21-nik ukiullip, Avalequt Gunnar Jakobsenip, ujaarineqarneranut atatillugu suli angusaqarfiusimanngilaq.
- Ujaasineq aqagu tallimanngornermi nanginneqassaaq, Katrine Sandgreenip oqaatigaa.