atuffatsinneq

Naqinnernik ilisarinnissinnaanngitsut ikiorneqalersut

Naqinnernik ilisarinnissinnaanngitsut atuarnissaminnut ilinniutissaat kalaallisut atuarsinnaasumik atortorissaaruteqalissapput

Naqinnernik ilisarissinnaanngitsut atugassaannik saqqummertoqangajalerpoq. Siunissami kalaallisut atuffatsittoqarsinnaalissaaq

Naqinnernik ilisarissinnaanngitsut qasserpiaanersut kisitsisaatigineqanngilaq. Qanoq aamma ikiorneqarsinnaanersut ineriartortinneqarsinnaanersulluunniit ilisimaneqarpianngilaq. Meeqqat paasiniarneqassappata Naqinnernik ilisarinnissinnaanngitsuusut, misissuinermi misileraanermili atorneqartartut amigartumik pigineqarput.

Ilinniartitaanermut naalakkersuisoq Nick Nielsen Siumut, Demokraatinit Anda Uldumimit paragraf 37 aqqutigalugu apeqqutaanut akissuteqarpoq.

Naqinnernut ilisarissinnaanngitsut atugassaqalissappulli, Nick Nielsen oqarpoq. Qarasaasiakkut kalaallisut atuaasinnaasumik ukiaru atorneqarsinnaalissasoq naatsorsuutigineqarpoq.

Qarasaasiakkut atortoq kalaallisut atuaasinnaasoq Syncenter Ræfnesimit suliarineqarpoq. Inunnut isigisamikkut ajornartorsiutilinnut, naqinnernik ilisarinnissinnaanngitsunut kiisalu atuffarluttunut atorneqartassalluni.

Danmarkimi innuttaasut 15 procentii atuarniarnermik allanniarnermillu ajornartorsiuteqarput. Kisitsit nunatsinnut nuunneqassappat inuit 2000-it 8000-illu akornanni naqinnernik ilisarinnissinnaanngitsuupput.

Nittartakkakkut qarasaasiami atuaasinnaasumik ajornanngitsumik aallertoqarsinnaavoq. iPadimi smartfoninilu ikkunneqarsinnaallutik, sulili kalaallisuumik saqqummertoqarnikuunngilaq.

Powered by Labrador CMS