Napparsimasut ataasiakkaat katsorsartinneranni cannabis nakorsaatitut akuerineqartarpoq
Immikkut ittumik akuersissuteqarsimatillugu perulullutik napparsimasunut cannabis nakorsaatitut ullumikkumiit kuseriaatitut iisartakkatulluunniit pisinnaalerput
Kalaallit Nunaanni perulullutik napparsimasunut cannabis nakorsaatitut ullumikkumiit kuseriaatitut iisartakkatulluunniit immikkut ittumik tunniussisinnaanermut akuersissutigineqarsinnaalersimapput.
Namminersornerullutik Oqartussat tusagassiuutinut nalunaaruteqarput.
Peqqissutsimut Naalakkersuisoq Agathe Fontain oqaluttuarpoq pingaarnerpaajusoq napparsimasup isumannaatsumiinnissaa.
- Napparsimasut ulluinnarni inuunerat pitsaanerulersittariaqarparput nakorsaatinik taamaattunik iluaqutaasinnaasunik. Taamaattumik naammagisimaarpara maanna napparsimasunut ataasiakkaanut nakorsamik akuersissuteqarnikkut illersorneqarnikkullu taamatut aaqqiissuteqarsinnaagatta, Agathe Fontain oqarpoq.
Akuerineqaqqaassaaq
Cannabis nakorsaat nakorsaatit pillugit inatsimmiippoq nakorsaatitullu atorneqalinnginnerani akuerineqaqqaartussaalluni. Cannabissit nakorsamit tunniunneqarsinnaasut sklerosemik nappaateqartunut anniarnaveersaatitut atorneqarsinnaapput aammalu assersuutigalugu kemoterapeertinnermi saniatigut sunniutaasunut nipaallisaaniarnermi.
Nakorsat pisortaat Anne Marie Ulrik malillugu suleriaaseq imaassaaq napparsimasoq immikkut ittumik atornissaanut qinnuteqarsinnaassasoq.
- Immikkoortortaqarfinni qinnuteqaat nakorsamit immersorneqartassaaq Dronning Ingrip Napparsimavissuani immikkoortortami nakorsaanermit suliarineqartassalluni. Innersuussinerit nakorsaatit pillugit ataatsimiititaliamut aalajangigassatut ingerlateqqinneqartassapput, Anne Marie Ulrik nassuiaavoq.
Aalajangiineq inunnut ataasiakkaanut tunngassuteqarpoq maanna nakorsaat taakkununnga iluaqutaasumik sunniuteqartoq pissutsinilu toqqissisimanartuni atorneqarsinnaasoq, Anne Marie Ulrik erseqqissaavoq.