isumaqatigiissut nutaaq
Napasup eqqaani nikkelisiorfik 50-inut inissaqalissaaq
Xploration Servicesip Maniitsup kujataani tupeqarfimminni allilerinissamut annertuumut piareersarput, taanna Canadamiut ingerlatsivianit North American Nickelimit atorneqarpoq
Suliffeqarfik kiffartuussinermik suliaqartoq Xploration Greenland A/S-ip (XS) North American Nickelimik suleqateqarnini annertusivaa.
Canadamiut suliffeqarfiutaat Maniitsup kujataani Napasup eqqaani ukiuni sisamani kingullerni nikkelinik ujaasipput, ujaasiffiusorlu maanna nunatsinni annersaavoq.
Canadamiunik suleqateqarneq annertusigaat
North American Nickel ukioq manna misileraalluni qillerinini juunip naanerani aallartissaaq, XS-illu Canadamiut ingerlatsiviannut isumaqatigiissutertik annertooq nutarterpaat.
Atuaruk: Aatsitassarsiornermik ingerlatsiviup annertuumik nassaarnissaq takorloorpaa
Kalaallit suliffeqarfiutaat akissarsianik aamma akileraartarnermut tunngasunik allaffissornermik, logistikkimik aamma assartuinermik, campimik 40-t 50-illu akornanni inuttalimmik sananermik aamma ingerlatsinermik suliaqassaaq.
Suliniut 2012-imi 15-it missaani inuttaqariarluni ukiut sisamat kingulliit pingasoriaammik allivoq.
Najugaqartut pissarsiariniaraat
XS campimi ulluinnarni ingerlatsinermut aqutsisuussaaq, ilaatigut nerisassiorneq eqqiaaneq aamma 2016-imi nutaatut napparsimmaveeqqamik ingerlatsisoqassaaq.
- North American Nickelip XS pingaarnertut kiffartuussisussatut ukioq manna toqqaqqimmagu soorunami nuannaarutigisorujussuuarput, pisortaq Martin Sandy Shalmi oqarpoq, taassuma naatsorsuutigaa ujaasisoqarnerani 20-it sulisorineqassasut, taakkunanilu amerlanerit nunatsinneersuussasut.
Atuaruk: Napasup eqqaani nikkelimik suliniut